Министерството за труд и социјална политика до 22 јули треба да изготви Предлог закон за измени и дополнување на Законот за заштита на децата.
Предложените измени во законот ќе се однесуваат на олеснување на постапката во користење на правото на посебен додаток. То подразбира дека на децата што имаат право на посебен додаток со траен наод, за наредната година тоа право ќе им се продолжи, без потреба од поднесување на ново барање за продолжување на користење на посебниот додаток.
Ссо измените во законот, родителите на децата што имаат потреба од посебен додаток, за деца со наод, оцена и мислење од стручен орган – за степенот на попреченоста во ментален или телесен развој што е со траен наод, ќе имаат олеснување пред првостепените органи и центрите за социјална работа.
Истовремено, со рок за изготвување, исто така, до 22 јули, ќе се дополнуваат одредбите за остварување на паричниот надоместок за помош и нега од друго лице.
Со овие дополнувања се очекува да им се овозможи на родителите на деца со телесни или ментални пречки во развојот и со најтешки облици на хронични заболувања, да користат право на надемосток на плата за скратено работно време.
На овој начин, се очекува да се подобрат животни потреби на лицата со попреченост и нивно вклучување во секојдневниот живот во заедницата.
Министерката за труд и социјална политика, Мила Царовска, на Денот на детето, 1 Јуни, вети дека со новата програма на Владата законски ќе се воведе специјален едукатор (дефектолог, логопед) во градинка и училиште каде што има деца со попреченост, со цел адекватна поддршка на децата и семејствата.
Б. Јордановска
