Вечерта во сабота во Белград се одржа 36-ти по ред протест на граѓаните „1 од 5 милини“, на кој на крајот на протестот, пред Претседателството кое е официјално седиште на Александар Вучиќ дојде до инцидент, кога тричлана делегација се обиде да ја тргне оградата пред објектот за да го остави списокот на барања на демонстрантите.
Како што јави дописникот на МИА, притоа дојде до туркање на демонстрантите со многубројното обезбедување во цивилна облека, која го спречи тргањето на оградата, а еден од организаторите на протестот заврши во Ургентниот центар.
Еден од организаторите на протестите, Срѓан Марковиќ, рече дека со обезбедувањето бил постигнат договор да се овозможи на протестната делегација да го остави списокот со барања за фер избори. Меѓутоа, откако беа спречени, демонстрантите се обидоа да ја отстранат оградата околу зградата на Претседателството.
Во исто време, дојде до реакција на бројно цивилно обезбедување по што дојде до меѓусебно туркање.
Марковиќ успеа да прескокне преку оградата и со список на барања во рацете се обиде да дотрча до влезот во зградата, но неколку членови на обезбедувањето го фатија и со употреба на физичка сила го вратија од другата страна на оградата.
На протестната делегација набрзо потоа и беше дозволено да стигнат до зградата на Претседателството и да го остават список со барањата, документ во кој се содржани 42-те точки на Експертскиот протест тим на протестите „1 на 5 милиони“, кои претставуваат црвена линија без чија имплементација до 1 септември, нема да има избори.
Сојузот за Србија (СзС) денеска остро го осуди овој инцидент и побара итно идентификување на лицата што ги нападнаа демонстрантите на протестот „1 на 5 милиони“, кои, според претходниот договор со полицијата сакаа пред зградата на Претседателството да остават препораки и заклучоци на стручниот тим на протестите.
-Ако станува збор за полицајци во цивилно, тие знаат дека тупаниците не се законско пропишано средство за одбрана на просториите околу зградата на Претседателството. Тупаници користат криминалци и хулигани, што на овој начин станаа луѓето кои се пресметаа со демонстрантите , се вели во соопштението на СзС.
Ако станува збор за припадници на српските вооружени сили кои го обезбедуваат претседателот, тогаш целиот настан преставува прв настап на армијата на улица по 9 март 1991 година.
-Прашањето е колку сме далеку од сценариото на (Слободан) Милошевиќ за изведување на тенкови врз граѓаните кои ја демонстрираат борбата за слобода и демократија. Јавноста има право да биде информирана кои се лицата што ги претепаа демонстрантите и протв нив да се покренат законски мерки, потенцираат во СзС.
