„Македонија блокира“ денеска напладне, истовремено со почетокот на собраниската седница за уставни промени, ќе се придружи на „Тврдокорни“ на протестот против промените во Уставот.
На вчерашната прес конференција Бачев изјави дека Македонија ќе победи и дека преку сенародниот протест ќе ја одбранат државата и македонскиот народ од геноцидот на сегашната влада.
Вчера „Тврдокорните“ го најавија протестот со клетва кон сите што нема да излезат и да го поддржат и предупредување дека сите што „грешно“ ќе се приклонат кон промена на името и вековното „херојско“ минато ќе им следува превоспитување. Или со клетви и закани денес повикаа на протест.
Бачев, кој од друга страна, се приклучува со истите побуди, најави дека како партија „Единствена Македонија“ има информации за смислени провокации и провоцирање инциденти, па повика на воздржаност во одбрана на националните интереси.
„Го повикуваме и претседателот на државата Ѓорѓе Иванов да биде на страната на македонскиот народ и да се придружи на големиот Семакедонски протест.
Антимакедонските политики го допреа врвот, или ќе дозволиме марионетската власт во Скопје да избрише се што е македонско или Македонија ќе победи. Целта на Сенародниот протест е со еден услов, а тоа е распуштање на Собранието и избори без Зоран Заев како премиер“, повика Бачев.
Останува да се види дали Иванов, ќе излезе на протест, дали воопшто ќе даде изјава на поддршка преку прес конференција или ќе остане настрана со образложение зошто не одговорил на повикот.
Пред Собрание, МВР веќе се спрема за протестот, половината од улицата е затворена за сообраќај, а присутни се голем број на оклопни возила.
„Македонија блокира“ и „Тврдокорни“ денешниот протест го најавија како последна шанса за одбрана на македонските интереси.
Б. Ј.
