Пред Собранието на Нови Сад од утрово се одржува протест поради фактот што на дневниот ред на седницата закажана за 31 јули, меѓу другото, беше и предлогот на градоначалникот Жарко Миќин за поставување споменик на жртвите на железничката станица во тој град.
На 1 ноември 2024 година, 16 лица загинаа, а едно лице беше тешко повредено кога се сруши бетонска настрешница тешка неколку тони.
Опозицијата, студентите што ги блокираа факултетите во тој град и граѓаните организирани на неформални собири повикаа на протест пред Собранието на Нови Сад.
„Ставот на студентите во блокадата на Универзитетот во Нови Сад е дека тие луѓе се последните што треба да постават споменик на жртвите, бидејќи тие се одговорни за падот на настрешницата и нивното убиство. Ова е нешто за кое ќе се борат и студентите и граѓаните на Нови Сад. Кога симболично поставивме споменик на жртвите, градоначалникот Миќин го осуди тоа“, изјави за Радио Слободна Европа Јелена Станојевиќ, студентка на Правниот факултет во Нови Сад.
Како што објави репортерот на РСЕ, пред зградата на Собранието е поставена метална ограда, зад која се наоѓаат неколку припадници на интервентната полиција.
Улицата е затворена за сообраќај, а демонстрантите прават бучава и извикуваат „Предавници“ и „Вашите раце се крвави“.
Тие сметаат дека иницијативата за поставување на споменикот не треба да доаѓа од членови на владејачката Српска напредна партија (СНС), бидејќи ги сметаат за одговорни за трагедијата, поради „корупција за време на реновирањето на зградата на железничката станица“.
„Мислам дека ова е крајната провокација на оваа лицемерна влада, која досега не направила ништо за да се осигура дека секој одговорен ќе заврши зад решетки. Фактот дека биле на погреби на несреќни луѓе, дека им поставуваат споменик, не значи дека не се одговорни. Затоа сме тука и бараме правда пред сè за сите жртви, но и за сите луѓе во оваа земја“, изјави за РСЕ Милан Продановиќ, од Нови Сад.
