Во изминатите неколку денови, откако започна изборната кампања се случија неколку посериозни инциденти. Засега надлежните институции молчат и не кажуваат кои се мотивите за инцидентите што се случија. На првиот ден од отпочнувањето на изборната кампања, беше фрлена бомба во скопско Стајковци. Вчера, Елвис Бајрам, градоначалникот на Шуто Оризари, а воедно и кандидат за градоначалник на општината за локалните избори е нападнат и повреден, додека одржувал средби со граѓанките и граѓаните на Шуто Оризари. Заедно со него бил и Аднан Мемед, шеф на кабинетот на градоначалникот.
Од МВР информираат дека се идентификувани и повикани на разговор пет лица, што учествувале во тепачката и во постапка е прибирањето докази за понатамошно постапување.
„Министерството за внатрешни работи најостро ги осудува сите облици на насилство, а особено во текот на изборната кампања. Изборниот процес е наменет за преставување на кандидатите и нивните програми и Министерството смета, дека тоа е единствениот начин преку кој граѓаните треба да бидат запознаени со учесниците во изборниот процес. Секаков обид за нарушување на демократскиот изборен процес и загрозување на безбедноста на граѓаните ќе биде соодветно санкциониран“, соопштуваат од МВР.
За помалку од една недела, во Кичево беше застрелан независниот кандидат за градоначалник на оваа општина, Алит Абази. Пукањето неофицијално се случи поради приватни нерасчистени сметки. За овој инцидент сè уште се чекаат официјалните резултати од истрагата.
Изутрината, избувна пожар во пекарницата „Кендо“, која што е во сопственост на таткото на поранешниот министер за транспорт и врски, Владо Мисајловски, кој пак е кандидат на ВМРО-ДПМНЕ за градоначалник на општина Ѓорче Петров. Пожарот го зафатил и покривот на семејната куќа на Мисајловски. Според очевидците, огнот првично избил од оџакот.
Пред полноќ пукнала експлозивна направа во семеен двор во скопската населба, Сарај. Полицијата извести дека за настанот била алармирана од сопственикот, кој што при увидот пријавил дека од експлозивната направа, му е оштетен и дел од куќата и возилото. Засега не се знае, кој и зошто му фрлил експлозивна направа во дворот.
ЦИВИЛ повикува институциите решително да се спротивстават на насилството, а престапниците да ги санкционираат соодветно на законот.
Дехран Муратов
