Расте бројот на граѓани кои државата треба да ги обештети бидејќи не им биле уплаќани пари во вториот пензиски фонд, соопштија денес од Агенцијата за супервизија на капитално финансирано пензиско осигурување (МАПАС).
Досега 18 милиони евра, пари од државната каса Владата им префрлила на пензиските друштва за осигурениците на кои од Фондот за пензиско осигурување не им се уплаќале средства.
Порамнувајќи се со државата приватните пензиските друштва засега се во минус од околу 20 милиони евра. Досега добиле 18 милиони евра од буџетот за осигурениците за кои не биле уплаќани пари. Но одземени им се 39 милиони по основ на пензиската реформа со која постарите осигуреници се бришат од вториот столб и нивните пари се префрлаат во ПИОМ.
Според скандалот кој пред неколку месеци го обелодени министерката за труд и социјална политика Мила Царовска, а за кој обвинителството реши да не поведе постапка, не биле префрлени пари за околу 12.000 осугуреници. Сега со порамнувањето бројката се искачи на 14.000 осигуреници кои немале уплати на приватните сметки.
Со реформата во пензискиот систем според која сите со навршени 52 години ќе може да бидат членови и да добиваат пензија само од првиот столб, од пензиското друштво велат дека досега 16 600 лица потпишале и доброволно се префрлиле од вториот во првиот столб. Од друштвата кон ПИОМ се слеале 2,4 милијарди евра.
Сепак, ова не се официјалните бројки. Целиот процес се одвива етапно и треба да заврши на 30ти септември.
Во текот на минатата година во пензиските друштва од вториот пензиски столб имало 490 илјади членови на просечна возраст од 35 години. Во друштвата слеани се околу 1 милијарда евра, покажуваат податоците од Годишниот извештај на МАПАС.
Од таму уверуваат дека пензискиот систем е стабилен и сигурен.