За време на третиот камп на граѓанската иницијатива „5 до 12“, поставен во паркот „Жена борец“, беа остварени повеќе работни средби со засегнатите страни, во проблемот и барањата за решавање на проблемите на лицата со попреченост и на нивните семејства.
Состаноци беа одржани со министерот за здравство Арбен Таравари, министерката за образование Рената Дескоска, Мила Царовска, министерка за труд и социјална политика, како и со претставници на партиите ЛДП и ВМРО-ДПМНЕ, со директорката на Клиниката за детски болести д-р Аспазија Софијанова и со работната група во Министерството за труд и социјална политика.
На средбите беа повторени барањата на иницијативата „5 до 12“ и ставовите за неутралност во однос на партиска или политичка определба, и за обединетост без разлика на јазик, боја на кожата, вера или религија.
Од „5 до 12“ понудија директно учество во процесот на изготвување на законски и подзаконски акти, решенија за дел од барањата и директно учество во процесот на имплементација на решенијата и изготвување на акционен план и временска рамка за извршување, соодветно приритетите и барањата по категории.
Како што информираат од иницијативата, состаноците поминале успешно со позитивен одговор за учество на иницијативата во работните групи во Собранието и во министерствата.
„Потврдија согласност за менување на приоритети во следниот ребаланс на буџетот. Потврдија потреба од почести работни состаноци заради изнаоѓање на брзи решенија за барањата и се согласија за заедничко изготвување на акционен план и на временска рамка за извршување, соодветно приоритетите и барањата по категории“, стои во соопштението на граѓанската иницијатива „5 до 12“
Следните активности на членовите на оваа иницијатива се подготовка на меморандум на соработка за остварување на задачите и целите на иницијативата и подготовка на Акционен план 2017/18.
„Работни состаноци и консултации за активностите на иницијативата се одржуваат секој работен ден од 12:00 до 15:00 часот во просториите на граѓанската иницијатива ‘5 до 12’. Сите поддржувачи, претставници на здруженија, неформални групи на граѓани, родители и лица со посебни потреби, се добредојдени, да учествуваат во процесот на припрема на стратешките документи, вклучително и во организација и реализација на активностите на иницијативата“, повикуваат од иницијативата.
