По повод одбележувањето на 20 годишнината од Охридскиот Рамковен договор, со свои ставови и реакции се огласија дел од партиите, преку соопштенија и прес-конференции.
Од СДСМ на прес-конференција со став – Мицкоски и ВМРО-ДПМНЕ се заглавени во деструктивните политики на етнички поделби, Рамковниот договор е темел на грѓанскиот концепт кој обединува. „Охридскиот Рамковен договор е мировен договор кој ја отслика фактичката реалност – дека фундаментот на државата е граѓанскиот концепт на соживот меѓу македонскиот народ и другите етнички заедници. Бегањето од одбележување на 20 годишнината од Рамковниот договор е тешко политичко лицемерие кое потврдува дека ВМРО-ДПМНЕ се уште е заглавена во поделбите на граѓаните, по етнички линии“, велат од СДСМ.
ВМРО ДПМНЕ преку соопштение изрази жалење што ДУИ, наместо да бидат модерна зелена партија се враќаат 20 години во минатото, се расфрлаат со народни пари и тераат паради. „Жалиме што ДУИ одлучи ревносно да му служи на тој кој најпогрдно ги навредуваше Албанците, ги навредува и Македонците, а за самите нив пред украдените избори во Јули 2020 велеше дека се корумпирани и дека се криминалци“, се вели во соопштението на ВМРО-ДПМНЕ.
Од ДУИ, пак, сметаат дека Охридскиот рамковен договор 20 години ја отсликува реалната и фактичка состојба на државата и нејзините граѓани за соживот со сите етнички заедници. Тие ја обвинија опозициската ВМРО-ДПМНЕ и нејзиниот лидер Христијан Мицкоски дека со бојкотот на прославата на договорот влијаат кон поделба на граѓаните. Од партијата на Али Ахмети се осврнаа и кон албанската опозиција предводена од Зијадин Села и Африм Гаши, потенцирајќи дека не се „редат“ до прогресивните сили и сојузниците од САД и ЕУ, туку, како што потенцираат, позади ВМРО-ДПМНЕ.
Од коалицијата Алијансата за Албанците и Алтернатива пак, во одговор кон обвинувањата од ДУИ, велат дека не само што не се против Охридскиот договор, туку работат да го заштитат истиот од било каква девалвација од луѓе како нив. „Ние добро ја разбираме загриженоста на ДУИ и мизерната ситуација во која тие самите избраа да бидат, по две деценискиот неуспех во спроведувањето на Охридскиот договор и во сите други сфери. Почитувани господа, претпочитавте да бидете на панелот и придружувани само од Бранко Црвенковски, Хари Костов, Христијан Мицкоски, Љупчо Георгиевски“, се вели во реакцијата на Алијанса за Албанците и Алтернатива.