Претседателот на Турција, Реџеп Тајип Ердоган, генералниот секретар на ОН, Антонио Гутереш и претставници на Русија и на Украина денес во Истанбул ќе потпишат договор за извоз на жито.
Договорот е според планот на Обединети нации за да се деблокира извозот на украинско жито преку Црно Море и да и се дозволи на Русија да извезува жито и вештачко ѓубриво. Тоа би можело да ја намали глобалната криза во храна поради што се зголемија цените на житото и други житни култури.
– Планот предвидува заедничка контрола на бродовите кога заминуваат и пристигнуваат во пристаништата на Црното Море и механизам што ќе ја гарантира безбедноста на рутите, соопштија турските власти.
Во Истанбул ќе биде формиран координативен центар за извозот во кој ќе членуваат претставници од ОН, Турција, Русија и Украина.
Украинскиот претседател Володимир Зеленски во видео обраќањето во четвртокот навечер нагласи дека очекува вести во петок од Турција за деблокирање на украинските пристаништа за извоз на жито.
М.Д.
