Во регионот на Доњецк, руски напаѓачи отворија оган на општинската автобуска станица во Торецк, при што загинаа осум локални жители, а четворица беа повредени, меѓу кои и три деца, изјави началникот на регионалната воена управа на Доњецк, Павло Кириленко, кој ја објави веста на Телеграм, пренесува Укринформ.
„Осум мртви, четворица ранети – ова се последиците од гранатирањето на Торецк, кое Русите го извршија денеска околу 11 часот. Меѓу четворицата повредени има и три деца. Според првичните информации, станува збор за артилериски оган. Тие погодиле автобуска постојка, каде во тоа време имаше гужва“, напиша Кириленко.
Дополнително, Русите ја оштетиле црквата и повредиле локален свештеник, нанесувајќи им штета и на околните станбени блокови.
„Руските окупатори секој ден гранатираат цивили – секој ден нашите луѓе се убивани и повредувани. Апелирам до сите оние кои се уште остануваат во Доњецк и се ставаат во смртна опасност! Апелирам до сите жители на регионот: не се претворајте во руска мета! Евакуирајте се веднаш!“, нагласи шефот на регионот.
Како што е соопштено, агресорот постојано ја гранатирал областа Доњецк, убивајќи и повредувајќи граѓани, уништувајќи ја цивилната инфраструктура во населените места. Снабдувањето со гас одамна е прекинато низ регионот, додека многу населени места исто така беа лишени од снабдување со вода. Непријателот се обидува да навлезе во украинската одбрана во неколку правци, иако неуспешно, принуден е да се повлече.
Не повеќе од 235.000 луѓе директно вклучени во одржувањето на одбраната и критичната инфраструктура треба да останат во регионот Доњецк до есенко-зимскиот период, додека останатите треба да се евакуираат, според украинските власти. До 24 февруари, околу 1.670.000 луѓе постојано престојуваа во регионот на Доњецк.
Вицепремиерката – министерка за реинтеграција на привремено окупираните територии Ирина Верешчук соопшти дека започна задолжителната евакуација од регионот на Доњецк.
Подготви: Д.Мишев
