„Врховниот суд, според важечкиот закон, нема законско право да толкува закон или член на законот. Според сегашната важечка легислатива, таа надлежност ја има Законодавно-правната комисија во Собранието. Врховниот суд може да донесе начелен став само за различна примена на еден закон, на пример, различни судови различно толкуваат еден закон, тогаш Врховниот суд треба да донесе начелен став како треба да се постапува“, изјави шефицата на Основното јавно обвинителство за гонење на организиран криминал и корупција – Скопје, Вилма Русковска гостувајќи во ТВ емисијата „Печат на неделата“ на Сашо Орданоски.
На прашање на гледач „дали бомбите“ што ќе стигнат до Врховен суд ќе се прогласат за неважечки Русковска одговори дека според последните чекори на Судот, не би ја зачудило доколку судиите и тоа го направат.
„Ставот на Венецијанската комисија е дека тие можат да бидат употребени како доказен материјал. Лошо ќе биде и за СЈО и за државата доколку се прогласат за неважечки доказ“, додаде Русковска.
Во однос на „бомбите“ на СЈО, Русковска изјави дека иако смета оти снимките се нелегално прибавени, сепак, треба да се искористат како доказ и дека СЈО треба да биде инкоорпорирано како посебно одделение во Јавното обвинителство.
Во однос на бегството на азилантот Никола Груевски, Русковска изјави дека во вчерашното соопштение се вели дека сите докази не се прегледани и дека тие имаат индиции и за други работи, дека Груевски не можел сам да избега од државата и дека сигурно имал соучесник во бегството.
За избришаните видео снимки од бегството на Груевски, од албанска страна на границата, Русковска рече дека повеќе не се обраќаат до Албанија, бидејќи тоа што требало да им помогне во истрагата, не им било доставено и дека нема што повеќе да се бара.
ОЈО вчера излезе со соопштение каде што се вели дека до овој момент надлежниот обвинител немал утврдено постоење на кривична одговорност на службени лица кои помогнале или учествувале во организирањето и реализацијата на бегството на осудениот Никола Груевски.
„Досега прибавените докази упатуваат на заклучок дека имало определени пропусти во постапувањето на надлежните институции, кои не претставуваат кривично-правно дејствие и не се во надлежност на Јавното обвинителствo“, стои во соопштението.
А. Петровска
