Министерката за одбрана Славјанка Петровска со месеци е мета на говор на омраза и навреди на социјалните мрежи.
Нова серија од крајно навредливи, дегутантни и мизогини коментари „изникна“ на социјалните мрежи по една сатирична објава, која наменски беше пренесена од портал кој е преполн со навредливи содржини, пред се кон владините претставници.
Иако, на крајот од текстот, со големи црвени букви пишува дека се работи за сатира:
НАПОМЕНА СТАТИЈАТА Е 100 % САТИРИЧНА ИЗМИСЛИЦА СИТЕ СЛИЧНОСТИ СЕ СЛУЧАЈНИ,
на коментаторите очигледно им беше доволен само насловот, кој го земаа „ здраво за готово“ и врз база на него го скроија своето „мислење“, што понатаму изроди лавина од сексистички, мизогини и деградирачки коментари за министерката.
Секако, шансата не ја пропуштија ниту подржувачите на Путин во земјава, со своите рашистички коментари да земат учество во нападите и говорот на омраза кон министерката.
принт скрин колаж – говор на омраза кон министерката Славјанка Петровска
Јавното понижување и говорот на омраза кон министерката Петровска трае со месеци, а надлежните институции сеуште молчат.
ЦИВИЛ најостро го осудува крајно сексистичкиот, мизоген, деградирачки и нечовечки однос и говор на омраза, во случајов кон министерката Славјанка Петровска, како и кон секоја жена и девојка, на, и вон социјалните мрежи. ЦИВИЛ постојано ги повикува институциите да преземат соодветни и остри мерки кон секој што произведува говор на омраза, како и граѓанките и граѓаните кои очигледно лесно подлегнуваат под организираната хајка со крајна омраза врз родова основа кон јавни личности, но и кон сите жени што не се изложени директно во јавноста.
Д. Мишев