Говорот на омраза и навредите кон министерката за одбрана Славјанка Петровска со месеци не престанува, дури во последните денови е зајакната, со крајно навредливи и деградирачки коментари од одредени профили на социјалните мрежи.
На социјалните мрежи постојано ја навредуваат Петровска во однос на нејзината телесна тежина, со крајно навредливи и деградирачки изрази.
Сексистичките и мизогени коментари продолжија по посетата на Петровска во Велика Британија, затоа што била пречекана со поздрав на македонски јазик и дека британската гарда и ја отсвири „Јовано, Јованке“.
Во однос на изјавите на министерската Петровска на почетокот на војната во Украина поврзани со НАТО, кон неа беа упатувани коментари со експлицитен и деградирачки говор на омраза.
Јавното понижување трае со месеци, а надлежните институции молчат. Досега реакции пристигнаа од ЦИВИЛ кој реагираше прв, а денеска реагираа од „СоНеаСме“, односно Ирена Цветковиќ од Маргини објави принтскрин колаж од навреди упатени кон Петровска и јавно ја поддржа, а на поддршката и се придружија и голем број жени активистки за човекови права.
Во реакцијата на #СоНеСме се наведува:
„Застануваме солидарно зад Славјанка Петровска, зашто ниедна жена не треба да биде мета на родово базиран говор на омраза. Изминатиов период повторно гледаме што сѐ ѝ се случува на една жена која има јавна професија и професионално си ја извршува работата. Сè додека јавноста ги гледа жените единствено низ сексистичка призма, ниту ќе видиме повеќе жени на одлучувачки позиции, ниту ќе се искорени објективизацијата на жените во сите полиња на нејзиното постење“.
По оваа реакција, поддршка на Петровска дадоа и сопартијките Радмила Шекеринска и Мила Царовска кој на своите профили на социјалните мрежи. Но, освен нивната јавна осуда, изминативе шеесетина денови ниту еден политичар не излезе да каже јавно или да повика, барем меѓу својот електорат и поддржувачи на воздржување од вакви коментари, освен Димитар Апасиев од Левица, по изборот на новата Влада во јануари година се огласи со коментар.
ЦИВИЛ најостро го осудува крајно сексистичкиот, мизоген, деградирачки и нечовечки однос и говор на омраза, во случајов кон министерката Славјанка Петровска, како и кон секоја жена и девојка, на, и вон социјалните мрежи. ЦИВИЛ постојано ги повикува институциите да преземат соодветни и остри мерки кон секој што произведува говор на омраза, како и граѓанките и граѓаните кои очигледно лесно подлегнуваат под организираната хајка со крајна омраза врз родова основа кон јавни личности, но и кон сите жени што не се изложени директно во јавноста.
Д. Т.
