Министерството за одбрана на Република Македонија, ја демантираше информацијата дека министерката Радмила Шекеринска ќе купи луксузно возило од буџетот на министерството.
Во веста која се појави вчера на неколку медиуми, пишува дека 187 илјади евра од буџетот на министерството за одбрана се пренаменети за набавка на луксузно моторно возило, и дека во истото ќе се вози министерката Радмила Шекеринска.
Според оваа информација, потписник на измената и дополнувањето во Планот за јавни набавки е министерката, и дека постапката е започната уште во 2017 година.
Министерството денеска излезе со демант, во кој стои дека ја демантираат секоја информација дека министерката потпишала измена и дополнување во Планот за јавни набавки со цел 187 илјади евра од буџетот на Министерството за одбрана да се пренаменат за набавка на луксузно возило во кое наводно ќе се вози министерката.
„Вистината е дека Министерството за одбрана во 2017 година доби донација од Република Чешка за набавка на патнички моторни возила за Службата за воена безбедност и разузнавање. Сумата која се споменува во текстовите е наменета за набавка не на едно, туку на 11 возила. Набавката нема да потроши ниту еден денар од буџетот на Република Македонија. Службата за воена безбедност и разузнавање нема вршено набавки на возила од 2002 година.“ стои во соопштението од министерството.
Во соопштението тие додаваат дека Владата на Република Македонија и Министерството за одбрана, парите на граѓаните ги насочуваат на сите вистински потреби, и дополнително обезбедуваат финансиска поддршка од други држави за подобрување на условите за работа на воената служба и тоа со средства од донација.
„Сакаме да нагласиме и дека после 10 години занемарување на АРМ и на војниците, оваа година Владата обезбеди пари за униформи и тоа може да се види во истиот план за јавни набавки. Исто така, оваа Влада обезбеди сите припадници на АРМ да добијат 10 проценти повисоки плати по повеќегодишно занемарување на армијата. Почитувани, дезинформациите што ги пласираат дел од интернет медиумите не се во интерес на јавното информирање, туку се обид во најчувствителниот период во кој се наоѓа нашата држава, да се разниша довербата во институциите на државата, и тоа во време кога и Министерството за одбрана и Владата вложуваат силни напори, да ги подобриме тешките состојби во државата кои долго време беа тема не само во домашната туку и во меѓународната јавност“ додаваат од министерството.
А.П.
