Се донесе Законот за јазици и се заокружи уште една фаза од мултиетничкиот живот во Македонија. Но, на државата и преостануваат уште многу фази за поминување во делот на градењето на мултиетничко и заокружување на концептот „Едно општество за сите“.
Треба уште многу да се направи за сите различни етникуми кои живеат на територија на Македонија, а Законот за јазици е само едно парче од сложувалката. Ромите, Бошњаците, Турците, Власите, Албанците и други треба дополнително да се интегрираат во нашето општество, во државните институции и да бидат целосно прифатени, без дискриминација.
Колку за илустрација, на терен Ромите се се’ уште најдискриминираниот етникум во земјава и нивната интеграција оди тешко. Но, овој напис не е само за овој етникум, туку за сите оние кои се македонски државјани. Општеството и институциите не смеат да препознаваат и да судат според етничка припадност, вероисповест и боја на кожа. Тоа не смее да биде заменето со поставување на политички фигури на високи државни функции, а да не се навлезе длабоко во суштинските проблеми.
Целта е секој граѓанин на Република Македонија да ја чувствува оваа држава како своја, затоа што Македонија ним им пришаѓа, и да се чувствува удобно во својата бела, црна, ромска, албанска, влашка бошњачка, турска… кожа. Македонија треба да е држава на сите, а институциите треба да го застапуваат и практикуваат концептот кој се промовира на голема врата – „едно општество за сите“.
Законот за јазици не смее во никој случај да се перцепира како исполнување на сите барања на заедниците кои живеат во Македонија, туку да претставува отскочна даска кон мултиетничка интеграција.
