СДСМ бара претседателката Сиљановска да не го потпише Указот за Законите за полиција и МВР

Претседателката Гордана Сиљановска-Давкова за денеска на пладне ја свика втората седница на Советот за безбедност.

Иако во соопштението од прес службата на претседателката не е точно наведено што ќе се зборува на седницата, од СДСМ изразија загриженост дека таа ќе ги потпише указите за Законите за полиција и внатрешни работи.

На денешната прес-конференција од СДСМ образложија дека со ваквите измени се отвора простор за партизирање на полицијата, а министерот за внатрешни работи Панче Тошковски добива неограничена моќ и значително проширени дискрециони овластувања.

„Сега Тој сам ќе може да поставува началници на Сектори за внатрешни работи и командири, без тие да исполнуваат основни критериуми за стаж, без да имаат искуство или претходно постигнати резултати. Се бришат и основните професионални критериуми за раководни позиции, што отвора широк простор за инсталација на партиски кадри без соодветно оперативно искуство.

Го избришале и условот кој децидно предвидува извесен број на години на искуство и стаж за напредување на највисоките раководни позиции – што значи дека, началник може да стане било кој што му е по ќејф на министерот, па дури и да е штотуку вработен приправник. Ова е апсолутно неприфатливо за позиции кои бараат огромно искуство и лидерски вештини и претставува директно депрофесионализирање на полицијата“, изјави Ана Чупеска, потпретседателка на СДСМ.

Чупеска најави дека освен апелот до Сиљановска, како парламентарна опозиција ќе се обратат и до меѓународната заедница.

„Ќе доставиме и официјални детални и референцијални елаборација за овие стравични решенија, и до амбасадите на ЕУ; САД; до ОБСЕ и Советот на Европа, но и до другите релевантни домашни и меѓународни институции, со цел да алармираме за овие крајно непримерни и загрижувачки чекори на власта“, изјави таа.