Претседателот на СДСМ, Венко Филипче, во интервју за Сител изјави дека власта свесно оставила правна празнина во Изборниот законик по укинувањето на одредени членови од страна на Уставниот суд, кои се однесуваа на бројот на потребни потписи за независни кандидати.
„Пред да бидат распишани изборите, дадовме поддршка цензусот за независни кандидатури да се намали на 0,5%. Тоа ќе беше доволно пониско од поранешниот праг од 1%, кој Уставниот суд го укина. Така ќе се спречеше можноста за злоупотреби и ќе се заштитеа независните кандидати. Но, власта не се обиде да обезбеди мнозинство – очигледно, тоа и беше целта,“ рече Филипче.
Тој предупреди дека новата регулатива ги става независните групи во подредена позиција:
„Сега, кога некој ќе се кандидира без поддршка на партија, на гласачкото ливче нема да стои името на независната група или коалиција, туку само ‘група на граѓани’. Тоа ги прави непрепознатливи пред избирачите, а владата свесно го овозможи тоа,“ нагласи тој.
Филипче исто така изрази сомнеж за политички и бизнис влијанија врз дел од независните кандидати, особено во Општина Центар, најавувајќи дека СДСМ ќе изнесе дополнителни информации во наредниот период.
„Сакаме граѓаните да имаат целосна слика и сами да проценат кому ќе ја доверат поддршката,“ порача тој, додавајќи дека СДСМ останува посветена на заштита на демократскиот процес и спречување на манипулации.
