ВЕСТ НА ДЕНОТ
На денешен ден, 17 мај 2015 година, 100,000 граѓанки и граѓани протестираа пред Владатa против режимот на Никола Груевски. Со слоганот #Доаѓаме! граѓаните најавија жестока борба за слобода и демократија, а единствениот начин за ослободување на државата од режимот беше тој да падне.
ВОЈНА ВО УКРАИНА
Командантите на единиците кои ја бранат челичарницата Азовстал, последното упориште на Украина во Мариупол, добија наредба од највисоката воена команда „да ги спасат животите на персоналот“, се вели во соопштението на Генералштабот на вооружените сили на Украина, пренесува Укринформ.
Генералштабот потсети дека 53 тешко ранети војници биле евакуирани во медицинска установа во Новоазовск, додека други 211 бранители биле пренесени во Оленивка преку хуманитарен коридор и треба да бидат вратени на територијата контролирана од владата преку процедура за размена на заробеници.
*
Претседателот Володимир Зеленски разговараше со германскиот канцелар Олаф Шолц за ситуацијата на фронтот, зајакнувањето на санкциите и притисокот врз Русија и изгледите за мир, „Одржавме продуктивни разговори со германскиот федерален канцелар Олаф Шолц. Разговаравме за ситуацијата на фронтот, понатамошниот притисок врз Русија, зголемувањето на санкциите, изгледите за мир. Ја цениме германската поддршка, вклучително и одбранбената. Сметаме на понатамошна германска помош на патот на Украина кон полноправно членство во ЕУ“, напиша Зеленски на Твитер.
*
Генералниот секретар на Обединетите Нации, Антонио Гутереш се обидува да најде решение со Русија, Турција и со уште неколку држави, за да се отвори украинскиот извоз и да се избегне недостиг од храна во светот, тврди добро упатен дипломат.
*
Херојството на бранителите на Мариупол овозможи да се потиснат руските трупи околу Киев и да се запре офанзивата врз регионите Запорожје и Доњецк, изјави министерот за одбрана на Украина, Олексеј Резников на новинарите, информира Еспресо.
„Благодарение на херојството на гарнизонот Мариупол, успеавме да ги потиснеме руските окупатори околу Киев. Тие [бранителите на Мариупол] ја послушаа наредбата да се ограничи група од 20.000 руски напаѓачи и да ги спречат да напредуваат во насока Запорожје и Доњецк. Сите се херои. Сега имаат нов поредок – да си ги спасат животите“, изјави Резников.
ИЗЈАВИ
„Што може да направи една национална влада и што не успеала да го направи или да го постигне? Веројатно сите ќе речат, да ги усогласи политиките со глобалните цели како ЦОР или другите повисоки цели на ЕУ. Северна Македонија не заостанува зад сето тоа: ние ја усвоивме Агендата 2030 и Целите за одржлив развој во 2016 година и ги повторивме во 2018 година и се стремиме да ја одржиме парадигмата на агендата – да не оставиме никого зад себе.
Националното собрание ја усвои новата Резолуција на миграциски политики и акцискиот план за 2021-2025 за државата, во декември 2021 година.
Затоа, морам да кажам дека не заостануваме во креирањето добар и сеопфатен документ: Национална стратегија на Република Северна Македонија за соработка со дијаспората за периодот 2019-2023“, изјави вицепремиерот за економски прашања, Фатмир Битиќи.
ФЛЕШ ВЕСТИ
НАЈАВА Извршниот комитет на ВМРО-ДПМНЕ донесе одлука за одржување голем граѓански протест што ќе се одржи на 18 јуни, изјави потпретседателот на партијата Тимчо Муцунски, соопштувајќи ги одлуките од вечерашната седница на ИК на ВМРО-ДПМНЕ.
РОК ЕУ потврди ако спорот меѓу Скопје и Софија не се реши до крајот на француското претседавање ќе има длабока криза со регионот. Софија за кревање на ветото повтори дека очекува „конкретни чекори заедно да се изодат без какви било календари или очекувања“. Скопје, пак, порача дека сите услови за старт на преговорите со ЕУ се исполнети и сега на потег е Бугарија.
АЛИЈАНСА Финскиот парламент се изјасни во вторникот за приклучување на земјата во НАТО со големо мнозинство од повеќе од 95 отсто од пратениците, со што се овозможува Хелсинки да ипрати во седиштето на Сверноатлантскиот воен сојуз формални барање за членство.
Шефицата на шведската дипломатија, Ан Линде денеска го потпиша барањето за влез во НАТО. Бидејќи руската инвазија на Украина предизвикува радикален развој на европската безбедност и геополитика, оваа акција го означува формалниот чекор на Стокхолм кон приклучување во воениот сојуз предводен од САД, ставајќи крај на децениската воена неутралност.
ПРАВДА Министерството за правда соопшти дека е формирана дисциплинска комисија која целосно ќе го испита случајот во врска со повикувањето во полициска станица на новинарката Соња Колевска Делевска за објавен текст.
ОДБЕЛЕЖУВАЊЕ ИДАХОБИТ се обележува секоја година на 17-ти Мај за да се привлече вниманието на властите, медиумите, јавноста, креаторите на јавното мислење и локалните авотритети за ситуацијата со која се соочуваат ЛГБТИ лицата (лезбејки, геј, бисексуалци, трансродови лица и интерсекс) и сите тие кои не се однесуваат во согласност со повеќето сексуални и родови норми.
ЕДИТОРИЈАЛ
„На 17 мај 2015 година, македонските граѓанки и граѓани дојдоа по својата слобода. На тој ден, тие решително го отфрлија режимот кој се служеше со лаги и закани, предизвикуваше тензии и поделби, спроведуваше грабеж и насилство. Јасно порачаа: Никогаш повеќе режим!“ пишува Џабир Дерала во „Денот кога граѓанките и граѓаните дојдоа по својата слобода“
Б. Јордановска
