Русија сè поактивно користи севернокорејски балистички ракети во нападите врз Украина, што претставува ново предупредување дека воената соработка меѓу Москва и Пјонгјанг се продлабочува и прераснува во безбедносна закана што ги надминува границите на Европа. На 12 август 2026 година, на 1.631-от ден од целосната руска агресија, украинските власти повторно укажуваат дека нападите врз украинските градови веќе се дел од поширок авторитарен воен синџир, во кој Русија користи оружје, муниција, војници и логистичка поддршка од Северна Кореја.
Амбасадорката на Украина во Северна Македонија, Лариса Дир, во објава на платформата X предупреди дека употребата на севернокорејски ракети од страна на Русија не е само украинско, туку и европско и глобално безбедносно прашање.
„рф сè поактивно користи севернокорејски ракети за напади врз Украина. Ова сведочи за продлабочувањето на воениот сојуз меѓу рф и КНДР, кој претставува закана не само за Европа, туку и за глобалната безбедност. Одговорот треба да биде зајакнување на санкциите и изолацијата на агресорот“, порача Дир.
рф сè поактивно користи севернокорејски ракети за напади врз 🇺🇦. Ова сведочи за продлабочувањето на воениот сојуз меѓу рф и КНДР, кој претставува закана не само за Европа, туку и за глобалната безбедност. Одговорот треба да биде зајакнување на санкциите и изолацијата на агресорот pic.twitter.com/jPDFGkz6Hn
— Larysa Dir (@dir_larysa) August 12, 2026
Пораката на амбасадорката доаѓа по новиот смртоносен руски напад врз Запорижја, за кој украинскиот претседател Володимир Зеленски изјави дека бил изведен со севернокорејски ракети. Според извештаите, нападот врз градот уби повеќе цивили и повреди десетици лица, а истовремено беа нападнати и други украински региони, меѓу нив Кијив и Днипропетровската област.
Зеленски предупреди дека Русија не покажува знаци на подготовка за мир, туку напротив, се подготвува за нова ескалација. Според него, Москва ја зголемува употребата на севернокорејско оружје и ја продлабочува воената зависност од Пјонгјанг, вклучително и во областа на балистичките ракети.
Оваа проценка се надоврзува на податоците на украинското воено разузнавање, според кои севернокорејска ракетна единица е распоредена во руската Воронешка област за поддршка на нападите врз Украина. Според извештаите, единицата брои околу 90 лица и може да располага со 120 севернокорејски балистички ракети и шест лансери. Украина оценува дека ова е значајно продлабочување на военото партнерство меѓу Русија и Северна Кореја.
Севернокорејските ракети KN-23 и KN-24 не се новина во руската војна против Украина, но нивната зачестена употреба е особено загрижувачка. Според достапните извештаи, Северна Кореја од крајот на 2023 година ѝ испорачала на Русија значителен број балистички ракети, милиони артилериски гранати, а подоцна и воен персонал. Ракетите KN-23 и KN-24 имаат поголем дострел од дел од руските ракети Искандер-M (SS-26), но се сметаат за помалку прецизни, што ја зголемува опасноста за цивилното население кога се користат против градови и населени места.
Министерството за одбрана на Украина претходно објави дека украински експерти ги анализирале севернокорејските ракети што Русија ги користела во нападите врз Украина. Украинското разузнавање, исто така, објави податоци за странски компоненти пронајдени во ракети и беспилотни летала што се користат за напади врз украинската енергетска инфраструктура, вклучително и во севернокорејските KN-23/KN-24.
Продлабочувањето на воената соработка меѓу Москва и Пјонгјанг има повеќе димензии.
За Русија, тоа значи дополнителни извори на ракети, муниција и воена сила во момент кога нејзината сопствена воена индустрија е под притисок на санкции и огромна потрошувачка на фронтот. За Северна Кореја, соработката со Русија носи политичка заштита, пари, технологија и можност за тестирање на нивното оружје во реална војна. За светот, тоа сигнализира нови закани, бидејќи станува очигледна спрегата меѓу санкционирани режими кои меѓусебно си обезбедуваат оружје, технологии и политичка поддршка за да ја продолжат агресијата и да го поткопуваат меѓународниот поредок.
Оваа соработка претставува предизвик за целиот систем на меѓународна безбедност. Уште во јануари 2024 година, група држави, меѓу кои и Украина, САД, Обединетото Кралство, земји членки на ЕУ и други партнери, ја осудија испораката на балистички ракети од Северна Кореја за Русија и нивната употреба против Украина. Во заедничката изјава беше нагласено дека таквиот трансфер претставува кршење на повеќе резолуции на Советот за безбедност на ОН, вклучително и резолуциите што самата Русија претходно ги поддржала.
Ако Русија може да набавува ракети од Северна Кореја, да користи ирански дронови, да ја одржува сопствената воена индустрија преку заобиколување на санкциите и истовремено да продолжи со масовни напади врз украинските градови, тогаш постојниот притисок не е доволен. Потребни се посилни санкции, поефикасно затворање на каналите за набавка, казнување на посредниците, ограничување на финансиските и логистичките мрежи и политичка изолација на сите структури што ја овозможуваат руската војна.
За Украина, зголемената употреба на севернокорејски балистички ракети значи уште поголема потреба од противвоздушна и противбалистичка одбрана, особено системи и пресретнувачи способни да ги соборуваат балистичките закани. Украинските власти со месеци предупредуваат дека недостигот од доволен број системи Patriot, ракети-пресретнувачи PAC-3 MSE и PAC-2 GEM-T, како и европски SAMP/T системи со ракети Aster 30, ја остава цивилната инфраструктура изложена на руски балистички напади. Потребни се и повеќе NASAMS и IRIS-T системи за одбрана од крстосувачки ракети, дронови и други воздушни закани.
Последните напади повторно покажуваат дека Русија не само што не покажува знаци дека сака да ја запре воената агресија, туку ја проширува преку нови партнери, нови канали за оружје и нови бранови терор врз украинските градови. Севернокорејските ракети во руските напади врз Украина се доказ дека Кремљ е во воен сојуз со еден од најизолираните и најрепресивни режими во светот, со последици што се чувствуваат од Кијив и Запорижја до Европа, Индо-Пацификот и глобалниот безбедносен поредок.
Џабир Дерала
