ДРАГАН МИШЕВ
Како изгледа руската посветеност на изнаоѓање решение за траен мир во сета своја величина ја покажаа масовните руски напад со ракети и дронови врз Украина, чија единствена цел, очигледно, се цивилите.
Како во завчерашниот напад врз станбените области на Кијив, убиени се 12 , повредени над 70 цивили, по што Цивил- центар за слобода излезе со соопштение во кое побара итно запирање на рускиот ракетен терор врз Украина, и вчерашниот напад врз Павлоград во кој 3 цивили се убиени, а десетици повредени, и секако најсмртоносниот напад оваа година врз Суми, на Цветници, во кој загинаа 34 цивили, а кој остана без осуда од високите претставници на администрацијата на Трамп.
Сето тоа додека траат разговорите на САД со Украина и Русија за договор за крај на руската војна против Украина. Кијив веќе се согласи на целосниот 30-дневен прекин на огнот предложен од САД, Досега Москва одбиваше, купувајќи време, кое сесрдно го добива од Трамп, и токму напротив, Русија дури во последните недели ги интензивираше нападите врз цивилната инфраструктура и станбените области во Украина.
И за цело време притисокот на администрацијата на Трамп е врз Украина, и нејзиниот претседател Зеленски. Дури и протечениот „конечен план“ на САД за ставање крај на руската војна во Украина кој содржи непристоен предлог со кој се бараат значителни отстапки од Украина и претседателот Зеленски, вклучително американско де јуре признавање на руската контрола врз Крим, заедно со де факто признавање на нејзината окупација на други украински територии, додека украинската страна добива многу малку придобивки, како ветување за „цврста безбедносна гаранција“ поддржана од европски земји, но е нејасно како оваа мировна мисија би функционирала и улогата на САД во неа Според мировниот план на САД, Украина би добила дел од Харкивската област окупирана од Русија, непречен премин на реката Днипро, која тече по линијата на фронтот во некои делови на јужна Украина и ќе добие компензација за обновата на земјата, иако во документот не е прецизирано како ова ќе се финансира.
Во документот исто така се споменува и нуклеарната централа Запарижја, која треба да биде признаена како контролирана од Украина, но управувана од САД.
Според дипломатски извори, САД нема да повикуваат на намалување на воените капацитети на Украина и нема да се противат на европските мировни сили во земјата, иако овие позиции се во спротивност со претходно изразените барања на Русија.
Откако Зеленски ја отфрли можноста за признавање на Крим како руска територија, американскиот државен секретар Марко Рубио и специјалниот пратеник Стив Виткоф одлучија да го прескокнат состанокот на високо ниво во Лондон, но затоа Виткоф како специјален пратеник на Трамп веќе престојува во Москва на разговори со Путин. Со истиот оној Путин кој најави 30 часовен прекин на нападите за Велигден, а истиот беше прекршен со артилериски и воздушни напади врз цивилни цели низ цела Украина.
И конечно, по последниот руски терористички напад кога Русија го започна најсмртоносниот бран напади врз Кијив во последните девет месеци, Трамп некако се одважи, па преку својата социјална мрежа Truth social, му пиша на Путин:
„Не сум задоволен од руските напади врз КИЈИВ. Не е потребно, и многу лош тајминг. Владимир, СТОП! 5000 војници неделно умираат. Ајде да го завршиме мировниот договор!
МНОГУ ЛОШ ТАЈМИНГ? Што значи за Трамп „многу лош тајминг“ за убивање украински цивили? Значи ли тоа дека според него има други, добри тајминзи кога на Путин му е дозволено да убива цивили?
Логиката на Трамп и неговата администрација, како тие ги сфаќаат напорите за обезбедување траен мир во Украина можеби најдобро говори изјавата на Стив Витков, специјалниот претставник на Трамп кој оствари средба со Путин во Санкт Петерсбург, кој ги потенцира комерцијалните бенефити кои тој би ги донел за САД,:
„Постои можност за преобликување на односите меѓу Русија и САД преку некои многу привлечни комерцијални можности кои мислам дека даваат вистинска стабилност и на регионот“.
Можеби токму затоа високи претставниците на Кремљ размислуваат да предложат идеја за „голема зделка“, која, наводно, вклучува можност за заживување на плановите за Trump Tower –„кулата Трамп“, облакодер од 150 ката во Москва, за да го наведат американскиот претседател да ги ресетира односите, за личната добробит на двајцата претседатели.
И сосема случајно, како што пренесува ДејлиСтар, деновиве руските коментатори се вклучија во кампањата за зближување на Русија и Сад, тврдејќи дека му помагаат на Трамп да ги присвои Гренланд и Канада во замена за помош со Украина.
Појавувајќи се на руската државна телевизија, Владимир Соловјов, заедно со неговите колеги водители на ток-шоуа, се вклучи во разговорот кога рече „ние ќе му помогнеме на Трамп да го земе Гренланд. И Канада“, пред друг да додаде „и Ирска“.
Некој би рекол дека одбрале „многу добар тајминг“
Текстот е личен став на авторот
