Се интензивира дебатата во јавноста пред референдумското изјаснување на граѓанките и граѓаните на прашањето „Дали сте за членство во ЕУ и НАТО со прифаќање на Договорот меѓу Република Македонија и Република Грција?“. Таа дебата во голем дел е цивилизирана, иако остра и со спротивставени ставови во поглед на целиот процес, но во еден дел е далеку под нивото на пристојноста. Извесни структури се служат со жесток говор на омраза, повици на насилство, црна пропаганда, спинови и лажни вести.
ЦИВИЛ – Центар за слобода воспостави мониторинг на состојбите во општествено-политички контекст од самиот почеток на процесот, со посебен фокус на почитувањето на едно од фундаменталните човекови права, а тоа е правото на глас. Мониторингот на ЦИВИЛ е непартиски, објективен и неутрален, а информациите и сознанијата што се добиваат од теренската работа се достапни за јавноста преку медиумската платформа на организацијата. Различните ставови и анализи се објавуваат во посебни, издвоени рубрики на веб страниците на медиумската платформа и не секогаш се совпаѓаат со ставовите на самата организација.
Воедно, организацијата ја согледа потребата јасно да ја дефинира својата позиција во поглед на Референдумот и да ги повика граѓанките и граѓаните да помогнат во мониторингот, но и во граѓанската едукација за правото на глас и борбата против лажните вести и говорот на омразата.
Важно е да истакнеме дека ЦИВИЛ не се меша во индивидуалните одлуки на своите членови и поддржувачи, како ни во одлуката на граѓанките и граѓаните за тоа дали ќе гласаат ЗА или ПРОТИВ на Референдумот. Цврст став на организацијата е дека треба да се гласа на Референдумот, бидејќи тоа е облик на непосредна демократија и не треба да се пропушти оваа историска шанса да се биде дел од донесувањето на една исклучително стратешка одлука за земјата.
Иако е демократско право на секој поединец, ЦИВИЛ не го препорачува бојкотот како облик на соопштување на ставот, особено во еден ваков процес.
Користењето на говорот на омразата и насилството, клеветите и манипулациите со лажни вести и спинови се неприфатливи и забранети облици на поддршка на која и да е иницијатива, за што релевантните институции се повикани да постапуваат според законот.
Еден од многубројните аргументи против бојкотирање на Референдумот е дека граѓанките и граѓаните не треба да остават другите да одлучуваат наместо нив, туку секој поединец, според своето сопствено убедување, да учествува во носењето на оваа историска одлука.
ЦИВИЛ останува доследен на своите принципи и определби. ЦИВИЛите никогаш ништо не кријат, од никого и од ништо не се плашат да го искажат своето убедување и размислување. Затоа, ЦИВИЛ бара од структурите што шират говор на омраза и лажни вести да престанат со своите напади, бидејќи со тоа го омаловажуваат големото мнозинство граѓанки и граѓани што сакаат да донесат сопствена одлука и да го искористат своето неприкосновено право на глас, па и апстинирање од гласањето.
Говорот на омразата и лажните вести не се соодветен начин на застапување на политички став.
ЦИВИЛ е непоколеблив во своите заложби за човековите права и слободи, секогаш и секаде, јасно и гласно.
Биди ЦИВИЛ!
