Претседателката Силјановска Давкова, празнично го помилуваше поранешниот градоначалник на Битола од редовите на ВМРО-ДПМНЕ, Владимир Талески, кој беше осуден на седум години затвор за злоупотреба на службената положба во случајот „Транспортер, скратувајќи му ја казната за една година.
Талески, кој помина три години во куќен притвор, по што му останаа уште четири години затвор, веќе беше помилуван во 2016 година од претседателот Иванов, со колективната аболиција.
Покрај екс градоначалникот на Битола и неколку други лица, Сиљановска го помилуваше и Шенол Маслани, брат на познатиот Шенки Версаче.
Шенол беше споменат во полицискиот билтен во 2019 година по акција против група која се заканувала на полициски службеник и тргувала со дрога, но не му беше поднесена кривична пријава.
Меѓу помилуваните, како што објави ТВ21, се и Акиф Бејадин Равмановски, член на наркокланот „Барон“, осомничен за убиствата во Шиша Бар и за убиството на Орхан Бајрами-Оки во Грција, но и дека пред една недела откако избега од затвор, пукаше и рани лице во паркот во Чаир,
Празничното помилување на претседателката го зафати и Марјан Ефремов, првоосомничен во аферата „Шпион“.
Нешто подоцна, претседателката Сиљановска во изјава за ТВ21 за помилувањата рече дека „личностите се навистина интересни во негативна смисла на зборот, тоа е факт, сега гледам јас“, признавајќи дека потпишувала што и подготвиле од комисијата, без да знае за кои лица се работи.
-Околу помилувањата прво јас кога ја конституирав комисијата за помилување која е составена од врвни експерти во оваа област и познавачи реков дека ќе ја почитувам нивната работа. Мислам дека кога се даваат коментари се заборава на што. Значи вие делото го анализирате така? Пред се делото. Кога се работи јас веќе и имињата не ги знам да бидам искрена меѓутоа кога јас ги потпишав овие одлуки по што се водев? Се водев од тоа дека во првиот случај не го знам ни името како беше да бидам искрена делото е, пресудата е 1 година и 3 месеци и делото се однесува на поседување неовластено поседување на оружје и на 5 куршуми. Тоа е делото. Веројатно тие се воделе по ова. Да личноста знам која е таа личност но лично јас зборувам за работата на комисијата. Кај вториот случај се работи за дело кое е врзано со насилство или на некоја наплатна станица некоја тепачка и казната е 6 месеци. Веројатно тие се воделе од ова заменувајќи ги обете кај првата е година и три месеци значи кога ги замениле овие казни со условна од три години, да личностите се навистина интересни во негативна смисла на зборот тоа е факт сега гледам јас тоа, но јас велам дека тие се воделе од конкретните дела. Претпоставувам дека има начин значи да се санкционира бидејќи да било делото членство во злосторнички здруженија и јас не знам какви опасни веројатно поинаку би било. Значи јас почитувам знаење, јас потпишувам одлуки меѓутоа јас велам дека никогаш директно нема да се мешам во работата на комисијата, точно е дека го имам последниот збор но мора да се има ова во предвид, изјави Давкова.
