ДРАГАН МИШЕВ
На 1 јануари 2026 Скопје и официјално ќе влезе во 1984 година. Тоа го обзнани малку помалиот Голем Брат Панче Тошковки, министер за внатрешни и адвокат на Големиот брат – Христијан Мицкоски.
Ве молам, немојте да се правите изненадени и вџашени, демек не сте знајале кога сте гласале. Големиот брат Мицкоски ова го најавуваше претходно во повеќе наврати.
И кога во јули го пушти пробниот балон со најавата дека Владата размислува да преземе низа мерки – а една од нив е и воведување на данок за немажени и неженети, за подоцна, на 30 септември да изјави дека формирањето многудетно семејство треба да биде врвен приоритет на државната политика и го оцени како „највисок патриотски чин“, што, небаре, бара негово преточување во законска одредба. Во такво патриотско многудетно семејство според премиерот, подоцна не ќе биде проблем да се одреди цена на децата, како што, според родителите за загинатите деца во трагедијата ви Кочани им рекол премиерот.
Намерата да се контролираат сите сфери на животот на граѓаните е повеќе од очигледна. „Safe City“ е само капка во морето. Oва особено ако се има предвид дека истава владејачка партија, која порано тајно ги снимаше телефонските разговори на илјадници луѓе, сега истото ќе го прави по законски пат. И неконтролирано.
Го слушам Големиот брат Панче, како вели дека се уледуваме на развиените западни земји. Брате Панче, забораваш да кажеш дека таму има функционални градови (со собирање ѓубре, без диви депонии, горење пластика и сл.), функционални сообраќајни решенија, функционален јавен транспорт (редовни, чисти, зиме затоплени/лете климатизирани автобуси, метроа, трамваи), па контролата со камери е само последователен процес. И тоа контролиран и во служба на граѓаните, не на владејачката номенклатура.
Епа Скопје, „Среќна“ Нова 1984 година,
Со љубов
Големиот брат
ЦИВИЛ МЕДИА | Ставовите и наодите во овој текст се целосна одговорност на авторите и не нужно ги претставуваат ставовите на донаторите или на другите партнери и соработници на организацијата.
