Претседателот на Алијансата за Албанците, Зијадин Села, не ги признава резултатите од вториот круг на гласање за локалните избори, на кои, како што изјави вчера, имало поткуп и уцени на гласачи вршени од партиски активисти, заедно со полицијата.
„Не го признаваме овој резултат!“, рече Села и најави дека ќе достават жалби до Општинската изборна комисија и до Државната изборна комисија.
Му порача лидерот на ДУИ Али Ахмети дека го чека на парламентарни избори и оцени дека лидерот на СДСМ и премиер Зоран Заев, иако декларативно се залагал за живот, рамноправност и соживот, успеал, како што рече, уште повеќе да ја продлабочи поделбата меѓу етничките заедници во Струга.
„Имајќи предвид дека демократијата е волјата на мнозинството, а мнозинство во Струга е албанското население, во сите албански села – 100 проценти и кај албанското гласачко тело, го имаме победено ДУИ, и тоа со длабок резултат од два спрема еден. Останува сега, тој (Заев – н.з.) да даде одговор. Не сме ги изгубиле изборите. Напротив, ако некој сакал да удира врз мојот легитимитет, како претседател на Алијансата на Албанците, ме направиле уште посилен. Али Ахмети, те чекам на парламентарни избори“, порача Села.
Д. М.
