Слобода и приватност

На тринаесеттата меѓународна конференција „Е-општество“ на тема „Слобода и приватност“ која се одржа денеска во Холидеј Ин, фокусот беше на реформите во областа на медиумите и зајакнувањето на јавната свест за реформските приоритети и за предизвиците во медиумската сфера.

На отворањето се обрати министерот за информатичко општество и администрација, Дамјан Манчевски, извршната директорка на Фондацијата „Отворено општество“, Фани Каранфиловска-Пановска и претставничката на управниот одбор на „Метаморфозис”, Радмила Живановиќ.

„Оваа конференција веќе трианесет години претставува можност за инклузивно и партиципативно вклучување на сите релевантни и значајни субјекти во презентација и дискусија на локални теми кои се важни за развојот на информатичкото општество. Таа претставува форум каде претставниците од невладиниот, владиниот, бизнис, академскиот сектор и медиумите имаат прилика не само да разговараат за предизвиците, туку и преку вмрежување и создавање партнерства да бараат и предложат решенија за развојот на информатичкото општество“, потенцираше Живановиќ.

Министерот Манчевски истакна дека темата на денешната конференција е интересна и дека ние како држава сме многу интересна дестинација за оваа тема, особено имајќи го предвид фактот што во изминатиот период се прославивме како „држава позната по лажните вести“. Манчевски ја истакна важноста на граѓанскиот сектор и невладините организации во решавање на проблемот.

„Во владата треба да гледате единствено како на партнер преку којшто ќе можете и ќе имате шанса да ги остварите своите интереси и своите замисли. Е-општеството е многу општ поим, опфаќа речиси сè, многу дилеми коишто ги имаме и во Владата и навистина очекуваме конкретни предлози и стратегии, на коишто им даваме релевантно значење“, рече Манчевски.

„Можна ли е слободата без сериозна заштита на приватноста? Значи ли екстремната заштита на приватноста ограничување на слободата? Треба ли слободата и приватноста да одат рака под рака ако сакаме да го задоволиме јавниот интерес? Или можеби слободата и приватноста одат во спротивна насока и се судираат? И каде е во тој случај линијата што ја цртаме за да го обезбедиме јавниот интерес и притоа да бидеме сигурни дека сме доволно слободни и доволно заштитени? Не сум сигурна дека ги имам одговорите на овие прашања, но сигурна сум дека ако ме прашате која е линијата на размена меѓу слободата и заштитата на приватноста, ќе речам слободата. Затоа што слободата е таа која ми помага да се борам за заштита на приватноста!“, заклучи Каранфиловска-Пановска.

Текст и фотографија: Маја Ивановска