На граѓаните на Словенија од денеска им е забрането да ги напуштаат општините каде што живеат, јави дописниот на МИА од Љубљана.
Ова го одлучи Владата, откако за време на викендот Словенците ги наполнија туристичките места не почитувајќи ги препораките да се остане дома. Забраната за напуштање на општините беше најавена уште на почетокот на минатата недела, но поради генералното почитување на ограничувањето на движењето мерката не беше активирана.
Сега надлежните се на став дека се исполнети условите за нови ограничувања со цел спречување на неконтролираното ширење на коронавирусот.
Поштедени од оваа мерка ќе бидат граѓаните кои не живеат во општината каде што работат и ако мораат поради грижа за стари или изнемоштени лице да патуваат надвор од својата општина.
Словенечката Влада донесе одлука со која пензионерите ќе можат да пазарат само од 8 до 10 наутро, кога маркетите ќе бидат отворени само за нив, јави дописникот на МИА од Љубљана.
Од Владата информираат дека ова се прави со цел оваа ранлива категорија граѓани да ја одвојат од другите и со тоа да ги намалат шансите да се заразат со коронавирусот кој може да биде опасен за нив.
Оваа мерка важи и за инвалидизираните лица и бремените жени.
Инаку, според одлуката на Владата во време на борбата против коронавирусот отворени ќе бидат и продавниците за земјоделски производи, аптеките, продавниците за медицински помагала, бензинските пумпи, поштите, трафиките и дуќаните за продажба на храна за животни.
извор: МИА
