пишува: ЏЕВДЕТ ХАЈРЕДИНИ
Прес конференцијата организирана во Владата, според мене претставува едно грубо пројавување на партиска пропаганда пред претстојните предвремени парламентарни избори. Да се издигне до тоа нивно на пропаганда почетокот или склучувањето на договорот за изградбата на делницата од 2 километри автопат, кон границата со Косово, е невиден апсурд!
Редењето на вицепремиерот за европски интеграции и наводен координатор за изградба на автопатот кон Косово, министерот за транспорт и врски, директорите на Агенцијата за патишта е несериозна работа.
Потребата да се изгради оваа делница е одамна и се споменува дека ќе започне. Целата делница е долга околу 12 километри. Сега тие најавуваат дека ќе почнеле со првите 2 километри кои се низ поле. Само за споредба, за 5-6 години косовската страна изгради автопат долг 65 километри, од кои од Качаник до Блаце е дигнат на столбови.
Се поставува прашањето, толку ли се наивни, толку ли не прават нас наивни за да им веруваме дека ваков еден проект заслужува да се користи за пропагандни цели пред избори, кога истиот тој вицепремиер, Албанец, одговорен и за изградба на автопатишта, и оди во Венецијанската комисија да го брани Законот за употреба на јазиците пред 60тина експерти и правници, мора секоја вечер да биде на телевизија?
Несфатливо ми е министерот за транспорт и врски да настапува со напишан говор, кој наместо тоа треба да се грижи за урбицидот што му се случува на Тетово од страна на Теута Арифи, за дивоградбите. Тој не наоѓа за потребно да и ги одземе ингеренциите за менаџирање со градежништвото на Теута Арифи, туку излегува заедно со останатите денеска на прес конференција за да користат еден проект како изградбата на автопат од 2 километри.
Замислете ги големите „успеси“ на функционерите. И ден денеска во Блаце, на самата граница со Косово околу 50тина деца учат во Косово затоа што не се во состојба да изградат едно училиште за овие ученици, кое не верувам дека чини повеќе од 100.000 евра. Дали ова личи на држава која секојдневно повторува дека треба да и се даде датум за почеток на преговорите затоа што Македонија ги исполнила сите барања од Европската Унија? Со овие луѓе кои се осомничени да одговараат за корупција и криминал? Треба ли да очекуваме да се спасат со рекламирање за тоа дека ќе почнела изградбата на 2 километри пат до Косово, а при тоа не знаеме ниту кога ќе се изгради целата делница од 12 километри?
Сите права се задржани. Услови за користење, авторски права и заштита на приватноста.
