Специјалното јавно обвинителство се откажа од обвинителниот акт за случајот „Сопот“, бидејќи според деталните анализи што ги направило ова Обвинителство не постојат докази дека обвинетите го сториле делото за кое се товарат.
Според специјалната јавна обвинителка Катица Јанева нема докази со кои може да се утврди обвинението за обвинетите.
Судот одлучи да ги ослободи и да го одбие обвинението и обвинетите ги упати да бараат отштета
Обвинителот од СЈО Бурим Рустеми на денешното рочиште рече дека единствениот доказ на кој им се заснова пресудата е исказот на сведокот Рамадан Бајрами, кој го дал под изнуда од УБК.
Припадници на УБК, како што рече Рустеми, вршеле психичка и физичка тортура врз сведокот, при што бил незаконски приведен и тепан во објект во Банско, струмичко.
– Сведокот добил закани дека ќе биде лишен од живот и бил присилен од припадници на УБК да напише изнудена изјава врз која се базира пресудата, рече обвинителот на СЈО.
СЈО утврдило дека лицата кои го испитувале Бајрами направиле тортура, но оти против нив не можело да се постапува бидејќи делото застарело во 2013 година.
Адвокатите побараа да се донесе пресуда со која се одбива обвинението.
Случајот „Сопот“ е од 2003 години, кога двајца полски војници и еден македонски државјанин загинаа, откако теренско возило на НАТО нагази на мина на локалниот пат Сушево – Сопот. Во овој случај десет лица беа осудени за тероризам. Тие се товарат дека подметнале експлозивна направа на локалниот пат Сушево – Сопот.
Основното јавно обвинителство за гонење организиран криминал и корупција, лани во јули го предаде предметот на СЈО, откако во јавноста беа објавени разговори на владини функционери поврзани со случајот.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
