Здружението за надворешна и меѓународна политика „Совет на амбасадори“ денеска преку соопштение го осуди чинот на анектирање на украинските области Доњецк, Луганск, Запорижја и Херсон од страна на Русија и побара таа да ги повлече нејзините војници од окупираните територии, јави МИА.
Совет на амбасадори смета дека овој чин претставува кршење на меѓународното право и е директна закана за светскиот мир, се вели во соопштението.
Советот на амбасадори, како што се додава, ги осудува и заканите на рускиот претседател Владимир Путин за употреба на нуклеарнoто оружје и смета дека меѓународната заедница и Обединетите Нации недоволно реагираат на овие закани, кои доколку се реализираат ќе можат да уништат дел од светската цивилизација.