Специјалниот претставник и координатор на Центарот за глобален ангажман на Стејт департментот на САД, Џејмс П. Рубин, се сретна денеска и со претставници на неколку граѓански организации. На средбата, специјалниот американски претставник ги повтори пораките веќе познати во јавноста, во поглед на дезинформациите чиј извор, во овој дел од светот, е Русија.
Рубин на средбата навести дека се подготвуваат голем број активности за справување со дезинформациите во регионот и во нашата земја, брифира еден од учесниците на средбата. На средбата станало збор за тоа дека од извонредна важност е соработката меѓу клучните фактори, како што се институциите, граѓанското општество и медиумите.
Претставниците на граѓанското општество ги претставија своите проекти, наоди и гледишта, како и активности за организиран одговор на општеството против дезинформациите.
На средбата беа истакнати важноста на соработката меѓу различните актери во општеството и државата и перспективите на справувањето со дезинформациите кои претставуваат и безбедносен ризик за земјата и регионот.
Џејмс Рубин, кој е во посета на земјите на Западен Балкан на средби со лидерите на највисоко ниво, во јавноста ја изнесе оценката дека „главен извор на закана во овој дел од светот се дезинформациите генерирарни од Русија.“
„Би кажал дека просторот овде е сериозно затруен, пред сѐ, од руски дезинформации. Претседателот Путин мислеше дека може да ја освои Украина и да ја подели Украина, но не успеа. Но, тоа не значи дека Русија не продолжува да го шири отровот на дезинформациите и поделбите“, рече Џејмс Рубин, за време на посетата на Северна Македонија.
Според Рубин, регионот е под силно влијание на манипулации и, како што вели, лаги што ги шират структури поврзани со Русија и со Кина.
М. П.
