ЦИВИЛ Медиа разговараше со Симона Спировска, активистка, за слободата на изразување и активизмот во контекст на борбата за промените кои настанаа.
ЦИВИЛ Медиа: Што подразбирате по слобода на изразувањето, медиумски слободи и активизам?
Спировска: Зборуваме за нешто што сѐ уште го немаме стекнато. По долгогодишната цензура од центрите на моќ на која се навикнавме, сега во овој период за кој мислиме дека се ослободивме од тој притисок, се автоцензурираме. Си забранувавме сами на себе да ги кажеме нешта пто ги мислиме со страв дека ќе бидеме повторно обележани и отфрлени. Затоа сметам дека најпрвин тоа треба да го надминеме за потоа да можеме да се избориме за она што значи слобода на говор и слобода на медиуми. Истото важи и за активизмот. Не мислам дека по секоја цена треба да се премолчува секоја грешка на новата влада само за да не се врати ВМРО. Крајната цел е сите да се опаметиме. Крајната цел е да ги застапуваме вредностите за кои се боревме.
ЦИВИЛ Медиа: На кој начин ги поддржувате или можете да ги поддржите слободата на изразувањето, медиумските слободи и активизмот?
Спировска: Поддршката доаѓа преку борба против автоцензурата, против цензурата која доаѓа од надвор, преку механизми кои ги користиме секојдневно, а не сме ги детектирале бидејќи ни е секојдневие… онаа борба за општество во какво сакаме да живееме.
ЦИВИЛ Медиа: Дали се соочувате со притисоци од политичките и бизнис центрите на моќта и како се справувате со нив?
Спировска: Најчесто ги игнорирам. Најпрвин тие закани не можат да ги сменат моите ставови. На почетокот се обидувам да дискутирам за проблемот, за разликите во ставовите кои постојат, меѓутоа човек на крај се откажува од каква било дискусија. Тие нарачани закани не се нешто што можеме да го промениме, а не се нешто што од друга страна можеме да го избришеме. Јас можам да се надевам дека ќе дојде време кога ваквите ситуации ќе се променат.
ЦИВИЛ Медиа: Кои се вашите препораки, како да се одбранат слободата на изразувањето, медиумските слободи и активизмот?
Спировска: Слободата ја имаме онолку колку што се залагаме да ја имаме. Слободата нема да ни дојде со седење дома. Ниту пак со помирување со нештата и прифаќање дека така стојат работите и не можат да се променат. Има изблици на слобода, но се надевам дека во иднина ќе има уште повеќе. Се надевам дека нема тоа да бидат исклучоци, туку ќе бидат правило и треба да продолжиме да ја браниме како до сега. Со промената на власта, сама по себе нема да дојдат промените што ги очекуваме сите. Само луѓето се менуваат што седат во Владата и одлучуваат за нас. Меѓутоа додека ние не сфатиме дека ние одлучуваме кој ќе седи во Собранието и Владата, сѐ дотогаш нема да ја имаме слободата која ја посакуваме и постојано ќе се цензурираме самите себе.
Биљана Јордановска
Камера: Дехран Муратов