Сојузот на синдикати денеска ги блокираше претставниците на Владата пред почетокот на седницата, порачувајќи им дека не држи ниту еден нивен аргумент за да нема повисоки плати во државава. Тие порачаа дека Владата треба да го стави нивното барање за минимална плата од 600 евра и за раст на сите други плати за 6.000 денари под итно на седницата што е во тек. Притоа, побараа Владата да им пружи рака на работниците, но и на бизнисот.
–Упатуваме пораката до Владата на денешната седница многу сериозно да говорат за барањата на работниците за зголемување на минималната плата и на другите плати. Бараме да му подадат рака и на бизнисот како што ќе им подадат рака на работниците и да ги ослободат од придонесите за задолжително социјално осигурување на оној дел што се однесува на зголемените плати. Пред една година тие еднострано го одбија, иако ССМ и работодавачите беа договорени за најмалку 6.000 денари да се зголеми платата на сите работници и да има ослободување за придонесите. Некој тоа еднострано го одби и го минираше целиот процес, изјави Трендафилов.
Тој рече дека на протестот има 24 луѓе, колку што има министри, функционери во Владата.
Тука сме да ве нервираме, како што тоа вие ни го правите нам – порача претседателот на ССМ.
И истакна дека Владата неосновано ги одбила нивните аргументи.
Аргументите не беа прифатени од Владата и од работодавачите, дека со зголемување на минималната плата на секоја една затворена фирма, две нови се отвораат, дека им создаваме на газдите капитал меѓу 5.000 и 10.000 евра во нето-износ на годишно ниво. Нивниот аргумент дека ќе ги зголемат платите ако се зголеми продуктивноста, не држи. Меѓународната организација на трудот укажа дека работник со 24.379 денари минимална плата му заработува месечно на газдата 290.000 денари. Само 17 проценти од вкупниот колач им се дава на работниците. Има пари во државата, но колачот не е правилно распореден, рече лидерот на ССМ.
Тој најави дека во наредниот период не исклучува ваквите таргетирани блокади со 21 човек во другите градови и таму да ги блокираат функционерите за да доаѓаат пеш на работните места.
Дополнително, оставаме простор до крајот на февруари да седнат и да кажат за колку пари ќе ја зголемат минималната плата и за колку пари се спремни да ги зголемат сите други плати, затоа што веќе немаат аргументи да не го направат тоа, рече Трендафилов.
Извор и фото: Нова.тв
