Очекувам воспоставување на некакви целокупни норми на живеење, што е навистина тешко со оглед на девастираната состојба во којашто бевме, вели Ирена Стеријовска, уметник и активист на Шарената револуција во разговор за ЦИВИЛ медиа за Перспективи 2018.
„Се надевам дека ќе почнеме да гледаме од сите надлежни институции и органи едно создавање на некаква можеби идеологија или ете можеби правец којшто ќе биде општоприфатен и строго ќе се држиме на правилата на игра. Во сите сфери мора да се создаде систем на валоризирање. Тоа е нешто што нам најмногу ни недостасуваше овие десетина години, па можеби и претходно. Мислам дека треба конечно да почне да функционира еден мерит систем, систем на меритократија, каде што подоброто секогаш победува. И сметам дека тоа се генерално цивилизациски вредности и сметам дека не може своеволно да се прекршуваат тие работи затоа што тоа не носи до било каква продуктивност“, вели Стеријовска.
Во однос на нејзиното делување во општеството како уметник Стеријовска смета дека голем проблем е критичката мисла, а со тоа и создавање на некаков вредносен систем за тоа што е добро и што не е.
„Да можеме да бидеме доволно свесни самите да одлучиме што е добро, што е квалитетна уметност, што е трајна вредност во уметноста, наместо да чекаме да ни се врати некој со награда од надвор па евентуално така да го валоризираме. Се надевам дека популистичкиот пристап на културата којшто го имаме можеби и сме го имале од секогаш, ќе се метаморфозира во еден пристап на бркање на квалитет во уметноста. Тоа подразбира создавање на плодна почва за уметниците да работат. Значи општеството да препознае кои уметници имаат капацитет да се извадат од една просечност којашто владее во повеќе сфери на уметноста. Се надевам дека ние уметниците како еснаф ќе останеме доволно силни, прибрани, сложни и чисти во идејата и во мислата да се избориме, бидејќи тоа сепак, не може само системот да го направи, туку мора да знаеме дека сепак ние сме учесници во системот. Да не бегаме од обврските и да не бегаме од борбата и да не бегаме од конфликтот, затоа што бегањето од конфликт носи до едноумие. Она што е битно е во ова ново време да има повеќе гласови, поголема конструктивност и така да се одбираат подобрите работи“, потенцира таа.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество. „Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Маја Ивановска
Камера: Дехран Муратов
Монтажа: Ермин Климента
Фотографија: Дехран Муратов