ВЕСТ НА ДЕНОТ
Ковачевски: Во првите 100 дена ги поставивме темелите за ефикасно, чесно и одговорно владеење, остваривме историски раст на минималната плата и пензии
Владата на Република Северна Македонија денеска одржа тематска седница посветена на остварувањата и достигнувањата на Владата и министерствата во првите 100 дена од работењето, соопштуваат од владината прес служба. На седницата премиерот Димитар Ковачевски кој претседаваше со седницата соопшти дека со оваа седница, како и со настаните кои ќе се случуваат во наредниот период, тој, вицепремиерите и министрите, ќе ги сублимираат и презентираат досегашните обемни остварувања.
Ковачевски нагласи дека одговорно и со целосна посветеност и внимание во Владата во првите 100 дена се фокусираше на формирање и на хармонизирање на новиот тим за да ги подготвиме и спроведеме најсоодветните одговори за сериозните предизвици кои нѐ очекуваа.
ИЗЈАВА НА ДЕНОТ
„Непријателот може да ги уништи ѕидовите, но не може да ги уништи темелите на кои стои моралот на војниците и на целата земја“, напиша претседателот на Украина, Володимир Зеленски на Телеграм и објави фотографии кои ги прикажуваат последиците од руското гранатирање.
ВОЈНА ВО УКРАИНА
Генералниот секретар на Обединетите Нации, Антонио Гутереш бара начини да ги запре борбите во Украина што е можно побргу. Гутереш го изјави ова за време на денешната посета во Москва, јавија локални медиуми, пренесува МИА.
Истрага за воените злосторства извршени од руските трупи во Буча и други региони на Украина од почетокот на воената агресија.
Експлозиите во Транснистрија, одметнатата проруска територија на Молдавија, украинското Министерство за одбрана ги опиша како „планирана провокација на руските тајни служби“, пренесува МИА.
Тврдењето на Москва дека постои „реална“ опасност од избивање на Трета светска војна значи дека Русија ја губи војната против Украина, ја пренесува Укринформ објавата на Твитер украинскиот министер за надворешни работи Дмитро Кулеба.
ФЛЕШ ВЕСТИ
ОЈО Жител на Мешеишта осомничен за загрозување на сигурноста на британската амбасадорка.
СОНК и Владата се договорија за зголемување на платите од 12 проценти, учениците продолжуваат со настава од утре.
ИНТЕГРАЦИИ „Крајно сум разочаран што сè уште разговараме за почеток на преговори со Северна Македонија и со Албанија. Мислев дека ова прашање го решивме пред две години, но сега повторно се врати на масата“, порача денеска од Софија еврокомесарот за проширување и соседска политика Оливер Вархеји во своето обраќање на Форумот за односите меѓу Европската Унија и Балканот (EU meets Balkans).
ЦИВИЛНИ АКТИВНОСТИ
ЦИВИЛ ќе ја одржи третата панел дискусија од серијалот „Зад димната завеса“ во четврток 28 април со почеток во 13 часот. Настанот ќе се емитува во живо, на Фејсбук и Јутуб. Тема на панел дискусијата е „Дезинформациите и пропагандата во медиумите: Влијание на проруските наративи врз евроатлантската ориентација на Северна Македонија“.
Учесници на настанот ќе бидат проф. Весна Попоска од Универзитетот „Визион“ – Гостивар, Зоран Бојаровски владин советник за медиумски реформи и Филип Стојановски од Метаморфозис.
ДЕЗИНФОРМАЦИИ
Експерти за руска пропаганда шират дезинформации за наводното одземање на документи од архивата на ОБСЕ во Мариупол, кои наводно сведочат за „злосторствата извршени од вооружените сили на Украина“, информираат од украинскиот Центар за спротивставување на дезинформации при Националниот совет за безбедност и одбрана, пренесува Укринформ.
ДИСТРИКТ
Во Дистрикт на Цивил Прес Студио, интервју на Зоран Иванов со Катерина Златановска Попова – тренер и обучувач за меки вештини и експерт за развој на кариера. Зборува за поинакви погледи, за поинакви можности, за нови животни работни шанси за младите и не само за нив, за нужноста од нестандардно, неконвенционално размислвање за својата сегашност, за својата иднина и за иднината на заедницата.
СЛОБОДНА ЗОНА
„Можат политичарите да конципираат политики и да не ги почитуваат кога не им одговара тоа и да изјавуваат сѐ што во тој момент мислат дека им е корисно, но дојде време кога граѓаните треба да си постават неколку прашања на себе за шините и возовите. Ако нѐ „извозеа“ со возот за социјализмот, па нѐ „иструскаа“ со демократизацијата и приватизацијата, време е да внимаваме и на возот во кој се качуваме и на шините по кои ќе се возиме кон Европа“, пишува Војо Маневски во колумната „Возови и шини“.
Д. Муратов
