Универзитетското студентско собрание на УКИМ ја дава својата јавна поддршка на протестниот марш „Марш за ангелите“, кој ќе се одржи утре, 29 април 2025 година, во Скопје, во организација на семејствата настрадани во пожарот во дискотеката „Пулс“ во Кочани, соопштува студентското Собрание.
Протестот ќе започне пред Обвинителството во Скопје во 12:05 часот – време кое симболично ја означува задоцнетата реакција – и ќе продолжи кон Градскиот плоштад, а потоа пред Собранието на Македонија.
Универзитетското студентско собрание на УКИМ, ги повика сите студенти и целата јавност да се приклучат и достоинствено, но гласно, да се испрати порака дека Македонија заслужува подобро.
Собранието го поддржува и барањето за јасни одговори и за итно преземање на одговорност од страна на институциите.
