Дел од студентите што се сместени во студентскиот дом „Стив Наумов“ во Скопје, во изминатите неколку дена немаат вода! Да не беа социјалните мрежи, за овој проблем никој немаше да дознае, затоа што студентите од овој дом, сè уште не излегле гласно да се побунат против проблемот поради кој немаат основни услови за нормален живот.
По социјалните мрежи се зборува дека веќе една недела, студентите се принудени за одржување на личната хигиена да полнат шишиња со вода. Конкретно, како што пишува Радио МОФ, се работи за проблем во третата зграда на погорните спратови, затоа што тие што се сместени на приземјето имаат вода.
„Четири пати се случува додека се туширам. да снема вода, и морам или да чекам да дојде, или да се вратам во соба и таму да се доисплакнам со водата од шишињата“, вели студентка сместена во третата зграда, со која разговарале новинарите на Радио МОФ.
А, од другите згради, се жалат дека немаат доволно топла вода во текот на денот.
ЦИВИЛ Медиа, за проблемот разговараше со директорката на студентскиот дом „Стив Наумов“, Даниела Темелкова.
„Го информиравме ЈП ‘Водовод и канализација’ за проблемот, и оттаму не известија дека се работи за недоволен притисок до повисоките катови, поради зафат на кој работат во тој реон. Проблемот ќе биде саниран до денеска до 14 часот“, вели Темелкова.
Истата информација ја добивме и од Министерство за образование и наука.
Со ЈП „Водовод и канализација“, за жал, нѐ може воопшто да се стапи во контакт поради проблем со нивната веб-страница.
Во известувањето што го добивме на мејл се вели дека од технички причини, електронските услуги на нашиот портал www.e.vodovod-skopje.com.mk ќе бидат привремено недостапни од 10 март 2017, до воспоставување на сервисот. Најверојатно, причина за тоа е преселбата на институцијата што се преместува во новата барокна Управна зграда.
На нашиот повик не одговори ни Студентскиот парламент.
Во разговор со Деа Здравковска од Студентскиот пленум, таа вели дека најчесто студентите кои живеат во студентските домови во Скопје, за своите проблеми го известуваат Пленумот, преку анонимни пораки, од каде што понатаму ја споделуваат информацијата. Но, за овој проблем се уште не добиле информација.
„Проблемот со студентите кои живеат во студентските домови е нешто што Студентски пленум се обидува повеќе од две години да го промени, да не се плашат, но тоа оди многу тешко. Причина за тоа секако е начинот на кој се добива место во студентските домови. Ако имаат некаков проблем, само мал дел од студентите го споделуваат, и тоа со инсистирање да бидат анонимни, бидејќи навистина им прават проблеми. Никој не може да си дозволи да даде изјава, без да го изгуби леглото. Ние го разбираме тоа, но до кога можат да ги трпат условите таму? Секогаш има две на страни проблемот…“, вели Здравковска.
Оваа недела, покрај проблемот со немањето вода, студентите од „Стив Наумов“ имаат проблем и со „депонијата“ што е во непосредна близина на домот. Двата контејнера што се наменети за отпадот од студентскиот дом, подолго време не се испразнети, поради што студентите се принудени да живеат во реа.
Марија Теговска
