Јавноста вчера слушна искази на уште тројца сведоци за нападот врз пратеникот и лидер на Алијансата за Албанците Зијадин Села во Парламентот на 27 април минатата година, а интензитет добиваат и рочиштата за предметот „Тенк“ на Специјалното јавно обвинителство (СЈО) кој се однесува на набавка на „луксузен“ мерцедес.
За нападот на Села вчера сведочеа претседателот на Собранието на РМ Талат Џафери, министерот за информатичко општество и администрација Дамјан Манчевски и пратеникот на СДСМ Александар Кирацовски, а уште тројца сведоци треба да бидат сослушани на ново рочиште на 16 месецов.
Според Џафери, лицата кои насилно влегле во Собранието и собранискиот прес-центар се заканувале дека ќе ги убијат сите и оти никој нема излезе. Тој во судницата препозна пет лица кои според него меѓу првите влегле во прес-центарот на Собранието на Република Македонија и ги нападнале пратениците.
Манчевски, меѓу останатото, наведе дека слушнале извици за закани, дел упатени конкретно за лица по име, а дел генерално за сите. Се слушало, како што рече, „убиј го Села, убиј го Заев, убиј ги предавниците“
Како што оцени по завршувањето на рочиштето Кирацовски, 27 април ќе остане црн датум од поновата историја на Македонија, датум на кој беше поткопан уставниот поредок, нападнати и повредени пратеници, новинари и вработени во Собранието.
Обвинетите за овој случај Кире и Цане Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра на претходните рочишта се изјаснија за невини.
За предметот „Тенк“, пак, на целодневното рочиште се слушаа прислушувани разговори кои се доказ во постапката. Претходно, беа отфрлени барањата на одбраната „бомбите“ да не се пуштаат во судница и за изземање на претседателот на Кривичниот суд Иван Џолев и судечкиот совет. СЈО тоа го оцени како обид на одбраната на обвинетите за одолговлекување на постапката.
Одбиеното изземање на судиите е доказ дека ова е политички, а не правен процес, оцени поранешниот премиер Никола Груевски кој со поранешната министерката за внатрешни работи Гордана Јанкулоска и поранешниот помошник министер во МВР Ѓоко Поповски се обвинети за набавката на луксузниот „мерцедес“ од 600 илјади евра.
– Судскиот совет денеска постапи сосема спротивно од советот во четвртокот кога адвокатите побараа изземање на судиите, претседателите и нивните заменици на Кривичниот и Апелациониот суд, реагираше Груевски, кој е обвинет во повеќе предмети на СЈО.
Извор: МИА
