Разговорот меѓу претседателите на САД и Русија денеска попладне траеше повеќе од еден час. Белата куќа и Кремљ објавија писмени изјави за условите за прекин на огнот.
Путин јасно стави до знаење дека нема намера да отстапи од своите максималистички барања. Тој очекува Украина целосно да се откаже од странската воена помош и разузнавачка поддршка, како и да ја запре мобилизацијата, доколку навистина сака прекин на огнот, објави Би-Би-Си.
Клучните поенти од соопштението на Белата куќа по разговорот меѓу Трамп и Путин се:
- Трамп и Путин зборуваа за „потребата од мир и прекин на огнот“ во војната во Украина, согласувајќи се дека треба да заврши со „траен мир“.
- Ја истакнаа потребата од подобрување на односите меѓу САД и Русија.
- Лидерите се согласија дека „движењето кон мир“ започнува со прекин на огнот врз енергетската инфраструктура, како и преговори за спроведување на поморскиот прекин на огнот во Црното Море.
- Разговараа и за Блискиот Исток „како регион на потенцијална соработка за да се спречат идни конфликти“.
- Тие разговараа за потребата „да се запре ширењето на стратешкото оружје“.
- Го споделија ставот дека Иран никогаш не треба да биде во позиција да го уништи Израел.
Readout of President Donald J. Trump’s Call with President Vladimir Putin:
Today, President Trump and President Putin spoke about the need for peace and a ceasefire in the Ukraine war. Both leaders agreed this conflict needs to end with a lasting peace. They also stressed the…
— Karoline Leavitt (@PressSec) March 18, 2025
Накратко, во соопштението на Кремљ се вели:
- Путин ја поддржува идејата на Трамп Украина и Русија да престанат да ја напаѓаат енергетската инфраструктура на 30 дена.
- Ќе започнат преговорите за безбедноста на поморството во Црното Море.
- На 19 март Русија и Украина ќе разменат 175 воени заробеници, а 23 тешко повредени украински војници кои се лекуваат во Русија ќе бидат испорачани на Украина.
- Кремљ бара да нема мобилизација или повторно вооружување во Украина за време на 30-дневниот прекин на огнот.
Разговорот е оценет како „искрена размена“ на мислења и ставови, а Трамп, очекувано, разговорот го нарече „конструктивен и продуктивен“.
„Искрена размена“, според политичките аналитичари, обично е дипломатски израз за остри или непомирливи разлики во мислењата. Европските коментатори тврдат дека претседателот Трамп би требало да е разочаран затоа што не успеа да го убеди својот руски пријател, како што го нарекува, да се согласи на сеопфатен 30-дневен договор за прекин на огнот – на копно, море и во воздух – што неодамна беше договорено со Украинците во Џеда.
Иако 30-дневна пауза во нападите врз енергетската инфраструктура ќе биде олеснување за украинските цивили, сепак, тоа не значи дека тоа ѝ одговара на Украина. Иако украинските копнени сили се повлекуваат во Курск и во делови од линијата на фронтот во источниот дел на Украина, нападите со беспилотни летала им нанесуваат директни удари на руските нафтени инсталации. Тоа во голема мерка ја отежна руската воена логистика.
Пред да се одржи разговорот меѓу Трамп и Путин, министерот за одбрана на Германија, Борис Писториус, го опиша рускиот претседател како „најголема закана за европската безбедност“. Тој рече дека постапките и реакциите на Путин докажуваат дека тој нема интерес за мир.
