Во фокусот и на денешниот ден сè уште останува именувањето на Џезаир Шаќири или командант Хоџа, за советник на премиерот Зоран Заев, како надворешен соработник од областа на внатрешната безбедност и борба против радикализмот. Военото минато на поранешниот пратеник, неговото учество во конфликтот во 2001 и одлуката на Владата за негово активирање на политичката сцена останаа актуелни и за социлајните мрежи, медиумите и за пошироката јавност.
Во областа на медиумите Здружението на новинарите во Македонија изрази незадоволство кон Апелацискиот суд и граѓанскиот суд за нивната примена на Законот за граѓанска одговорност за навреда и клевета. Сомневајќи се на политичка заднина за лошо процесуирање на случаите за навреда и клевета во кои се вклучени онлајн медиумите, од ЗНМ изјавија дека во најкраток рок очекувааат да се постапи по нивното барање за усогласување на судската пракса и во иднина Граѓанскиот и Апелацискиот суд во Скопје да ги процесуираат предметите според Законот, исто така најавија дека ќе достават и претставка до Судскиот совет за сите судии што несоодветно и селективно го применуваат Законот со цел да се утврди одговорност.
Никола Груевски денеска присуствуваше на рочиштето во случајот „Тенк“, како обвинет за набавката на луксузниот мерцедес од 600 илјади евра. Одбраната на Груевски побара изземање на обвинителите од СЈО. Претходно одбрана бараше изземање на судиите кои ги водат овие предмети, како и на судии од Апелациски суд, кои по претпоставка би дошле во допир со предметите во иднина, но беа одбивани. Образложението за изземањето на случајот од СЈО е претпоставката дека Катица Јанева, како граѓанин е оштетена, затоа што СЈО е корисник на буџетски средства.
Во пресрет на одблежувањето на тригодишнината од „малата војна“ во Диво Насеље, Куманово, на 9 мај 2015 година, ЦИВИЛ -Центар за слобода организира панел -дискусија утре во Комитет, Куманово, со почеток во 13 часот. Учесниците на настанот ќе обидат да дадат одговор на овие и на многу други прашања поврзани со настаните и судските процеси за Диво Насеље.
Биљана Јордановска