На конференцијата „За општество ослободено од корупција“ која ја организираше ЦИВИЛ – Центар за слобода, генералната секретарка на Секретаријатот на Државната комисија за спречување на корупција, Розета Трајан, својот говор го започна цитирајќи го Бајрон кој вели: „Борбата против корупција не е само добро владеење, таа е и самоодбрана и патриотизам“.
„Постои огромна патриотска должност на секој чинител во општеството да се бори против корупцијата, но и да даде активна контрибуција во борбата против корупција. Бидејќи корупцијата е таа којашто ја намалува вербата на граѓаните во општеството, ги загушува креативноста и инвентивноста, не се вреднува талентот на најспособните и ги руши вредностите. Само општество коешто е ослободено од корупција може да биде општество кое е фокусирано кон прогрес, напредок, развој и просперитет. Поради сето тоа, создавањето на општество ослободено од корупција треба и мора да биде приоритет и императив. Предизвик со којшто мора сериозно да се соочиме и на којшто треба посветено да работиме“, истакна Трајан.
Трајан исто така нагласи дека овој настан е потврда дека е неопходен сериозен пристап во борбата против корупцијата, додавајќи дека ДКСК во изминатиот период беше нем посматрач на сите случувања во општеството, состојба која пред се се должи на нејзината неефикасност, нетранспарентност и партизираност.
„Но денес имаме една нова реалност. Денес имаме нов предлог текст на закон за спречување на спречување на корупција и спречување на судир на интереси. Сакам да изразам голема благодарност до Министерството за правда којшто даде несебичен придонес и во целиот овој период ни помага како институција да се справиме со сите проблеми и предизвици. Но исто така сакам да се заблагодарам и на нашите пријатели од Европската Унија, невладините организации, граѓанските активисти, новинари и сите останати чинители коишто овој период несебично ни помагаат“, рече Трајан.
За законот Трајан вели дека тој претставува едно солидно законско решение, но и дека во процесот на имплементација и заживување треба предвид да се земат сите решенија за нивно подобрување.
„Добро е што сега изборот на членови на Државната комисија за спречување на корупција ќе се базира на компетентност, личен и професионален интегритет, соодветно работно искуство, со елиминација на партиските влијанија, а во присуство на јавноста, невладините организации, медиумите, како и експертската фела. Но, затоа пак во однос на вработените и статусот на вработените во Секретаријатот на ДКСК се уште постои можност и потреба за подобрување, особено во делот на поголема заштита на вработените за да бидат независни во нивното работење и постапување“, смета Трајан.
Таа додаде дека и во отсуство на Комисијата, Секретаријатот и понатаму продолжил со работа, но само административно и технички, поради сегашното законско решение, според кое Секретаријатот нема можност да одлучува по предмети и пријави.
„Во периодот од месец март, до денеска, на адресата на ДКСК се примени голем број на пријави за корупција, оформени се предмети од областа на судир на интереси, обработени се и јавно се објавени анкетни листови и промени на имотна состојба, обрасци на институции и ред други работи“, вели Трајан.
Според Трајан, во однос на контролата на финансирањето на политичките партии останува нејасно која институција ќе биде главна во контролата на истото. Таа потсети дека ДКСК носи годишен план за работа, а во новото законско решение се предвидува и посебен план за контрола на финансирањето на политичките партии, што не е во согласност со препораките од ГРЕКО според кои главна и централна институција за контролата на финансирањето на политичките партии е Државниот завод за ревизија, а ДКСК во секој момент ад-хок може да прави контрола на политичките партии, на нивното финансирање, што е во согласност со Изборниот законик каде што контролата се прави за време на изборната кампања.
Маја Ивановска
Камера: Атанас Петровски
Монтажа: Ариан Мехмети
