Американскиот претседател Доналд Трамп влезе во нов судир со медиумите откако со навредливи зборови ѝ се обрати на новинарка која го праша за неговите тврдења поврзани со неодамнешното пукање во Вашингтон, пренесува Индипендент.
Инцидентот се случи откако новинарката го доведе во прашање тврдењето на Трамп дека администрацијата на поранешниот претседател Џо Бајден не спровела соодветни безбедносни проверки на авганистанските државјани кои дошле во САД во рамките на програмата Operation Allies Welcome во 2021 година.
Трамп ја прекина новинарката и ѝ се обрати со навреда, прашувајќи ја дали е „глупава личност“, по што додаде дека луѓето за кои зборува „дошле со авион заедно со илјадници други што не требало да бидат таму“.
Коментарот следуваше по обидот на новинарката да го соочи Трамп со изјавите за осомничениот Рахманулах Лаканвал, кој, според полицијата, е поврзан со убиството на припадничка на Националната гарда, Сара Бекстром. Според достапните информации, Лаканвал пристигнал во САД токму преку програмата за евакуација по падот на Кабул.
Ова не е прв пат Трамп јавно да влезе во остар конфликт со новинари. На 18 ноември, тој ѝ се обратил со навредливи зборови и на новинарката Кетрин Луси од Блумберг, повикувајќи ја да „молчи“ кога таа се обидела да постави дополнително прашање во врска со случајот на Џефри Епштајн.
Настаните дополнително ја засилија дебатата за односот на американскиот претседател кон медиумите и за употребата на навредлив речник во јавната комуникација од Белата куќа.
Ј. Ѓ.
