Трамп ставил вето на израелскиот план за убиство на врховниот лидер на Иран, ајатолахот Али Хамнеи

Претседателот Доналд Трамп ставил вето на израелскиот план во последните денови за убиство на врховниот лидер на Иран, ајатолахот Али Хамнеи, изјавија двајца американски претставници за Ројтерс во неделата.

„Дали Иранците убиле некој Американец? Не. Додека не го сторат тоа, дури и не зборуваме за гонење на политичкото раководство“, рече еден од изворите, висок функционер на американската администрација.

Функционерите, зборувајќи под услов на анонимност, рекоа дека високи американски претставници биле во постојана комуникација со израелските претставници во деновите откако Израел започна масовно напад врз Иран во обид да ја запре неговата нуклеарна програма.

Тие рекоа дека Израелците пријавиле дека имале можност да го убијат највисокиот ирански лидер, но Трамп ги принудил да се откажат од планот.

Функционерите не кажаа дали самиот Трамп ја пренел пораката. Но, Трамп често комуницирал со израелскиот премиер Бенјамин Нетанјаху.

Кога беше прашан за извештајот на Ројтерс, Нетанјаху, во интервју во неделата за емисијата „Специјален извештај со Брет Бајер“ на „Фокс њуз“ рече:

„Има толку многу лажни извештаи за разговори што никогаш не се случиле и нема да навлегувам во тоа“.

„Но, можам да ви кажам, мислам дека правиме што треба да направиме, ќе направиме што треба да направиме. И мислам дека Соединетите Држави знаат што е добро за Соединетите Држави“, рече Нетанјаху.

Трамп се надева на продолжување на преговорите меѓу САД и Иран за нуклеарната програма на Техеран. Разговорите што беа закажани за недела во Оман беа откажани како резултат на нападите.
Трамп во петокот за Ројтерс изјави дека „ние знаевме сè“ за израелските напади.

Д. Мишев