Претседателот на САД, Доналд Трамп, на 7 септември посочи дека е подготвен да започне нова фаза од санкциите против Русија како одговор на војната во Украина и планира да разговара со рускиот претседател Владимир Путин „многу наскоро“, пренесува Кијив Индипендент.
Коментарите на Трамп доаѓаат еден ден откако Русија започна рекорден напад со беспилотни летала и ракети врз Украина преку ноќ – најновиот во серијата масовни напади во услови на притисок на Вашингтон да посредува во мировен договор.
За време на брифингот во Белата куќа на 7 септември, на новинарско прашање дали е подготвен да премине во „втората фаза“ од санкциите против Русија, Трамп одговори:
„Да, сум“, не дадајќи детали за тоа што би вклучувала оваа следна фаза, ниту пак постави временска рамка за дејствување на САД.
Подоцна истиот ден, Трамп им рече на новинарите дека планира да разговара со Путин „многу наскоро“.
„Многу наскоро. Во текот на следните неколку дена. Гледајте, ќе го завршиме тоа. Ситуацијата меѓу Русија и Украина. Ќе го завршиме.“
Трамп, исто така, рече дека „не е воодушевен“ од најновиот масовен напад на Русија, во кој беше оштетена зградата на Кабинетот на министри во центарот на Кијив и беше лансиран најголем број беспилотни летала кон Украина во војната од целосен обем.
„Не сум воодушевен од она што се случува таму“, рече Трамп.
„Верувам дека ќе го решиме тоа. Но, не сум задоволен од нив. Не сум задоволен од ништо што има врска со таа војна.“
Трамп рече дека „одредени европски лидери“ ќе ја посетат Белата куќа во следните два дена за да разговараат за мировен договор, иако не даде имиња или детали.
Истиот ден, американскиот министер за финансии Скот Бесент изјави дека САД се подготвени да соработуваат со европските сојузници за да „зголемат притисокот врз Русија“, првенствено преку проширување на секундарните тарифи врз земјите што купуваат руска нафта.
Бесент изјави за NBC News дека овој потег би можел да ја ослаби веќе заостанатата економија на Москва и да го принуди рускиот претседател Владимир Путин на преговарачка маса.
Иако Трамп во неколку наврати се закани дека ќе воведе строги казни врз Русија, неговата администрација не донесе никакви нови санкции против Москва откако Трамп ја презеде функцијата во јануари. Во некои случаи, администрацијата на Трамп дури и ги ублажи ограничувањата што беа претходно во сила.
Белата куќа, исто така, се закани дека ќе воведе широко распространети секундарни тарифи врз руските увозници на нафта, но го презеде овој чекор само еднаш: Во август, Трамп воведе високи секундарни тарифи врз Индија, еден од главните купувачи на руска нафта од целосната инвазија на Украина во 2022 година.
Индиските претставници изјавија дека американските тарифи нема да го спречат увозот на руска нафта во земјата.
Иако Путин одржа мировни разговори со Трамп во Алјаска на 15 август, тој оттогаш покажа мал интерес за мировниот процес и не се согласи да се сретне директно со претседателот Володимир Зеленски.
Претседателот на САД, Доналд Трамп, му го даде на рускиот претседател Владимир Путин „она што го сакаше“ со средбата со него во Алјаска минатиот месец, рече претседателот Володимир Зеленски во интервју за ABC News објавено на 7 септември.
„Штета е што Украина не беше таму, бидејќи мислам дека претседателот Трамп му го даде… на Путин она што го сакаше“, рече Зеленски за самитот на високо ниво во Анкориџ на 15 август.
Д. Мишев
