ЦИВИЛ неодамна ги повика своите членови, поддржувачи и учесниците на семинарите за граѓанско новинарство, набљудувачите на претходните изборни процеси, како и сите заинтересирани полнолетни граѓанки и граѓани да аплицираат за краткорочни изборни набљудувачи. Крајниот рок за пријавување е 10 јули, на полноќ. Има слободни места за набљудувачи од целата земја, но особено од општините надвор од Скопскиот плански регион.
ЛИНК ДО АПЛИКАЦИЈА
Набрзо по селекцијата на набљудувачи, ќе се одржат и семинари за обука на набљудувачите. Кандидат(к)ите се повикани да бидат подготвени за посета на семинар за обука во втората половина на јули. Обуките се задолжителни за сите избрани набљудувачи, без оглед на тоа дали биле набљудувачи на ЦИВИЛ и во некој од претходните изборни циклуси. На обуките ќе бидат потпишани и договорите за ангажман, како и познатата Повелба на набљудувачите на ЦИВИЛ.
ЛИНК ДО АПЛИКАЦИЈА
Во одговор на најчесто поставуваните прашања од заинтересираните, од Организацијата нагласуваат дека сите набљудувачи на ЦИВИЛ се мобилни, односно дека секој набљудувач има обврска да покрие во просек десет избирачки места.
Особено важно е да се напомене дека четворица од пријавените кандидат-ки ќе бидат селектирани како ДОЛГОРОЧНИ МОБИЛНИ НАБЉУДУВАЧИ, кои ќе му се приклучат на постојаниот тим за мониторинг на ЦИВИЛ. Дополнителните долгорочни набљудувачи ќе започнат со работа два месеци пред одржувањето на првиот круг на изборите. За нив ќе се организира посебна обука.
На прашањата дали и колку се плаќа овој ангажман, од ЦИВИЛ известуваат:
„Хонорарите за изборните набљудувачи на изборниот молк и денот на гласањето изнесува до 70 евра (бруто), додека долгорочните набљудувачи ќе потпишат договори во износ од 200 евра. Зависно од квалитетот на извршените задачи, овие износи може да бидат намалени или зголемени.“
Мониторингот на ЦИВИЛ подразбира мобилност, посветеност и непристрасност. Краткорочните набљудувачи се активни во текот на изборниот молк, на денот на гласањето и еден ден по гласањето.
Членови на тимови на меѓународни или домашни набљудувачки мисии, партиски функционери и активисти вклучени во изборната кампања, како и кандидати на изборите, немаат право на учество на овој повик.
Сите заинтересирани за набљудување на локалните избори, можат да аплицираат на следниот линк:
ЛИНК ДО АПЛИКАЦИЈА
За процесот на аплицирање, од ЦИВИЛ додаваат:
„Аплицирањето е крајно едноставно, апликацијата се пополнува за неколку минути и од телефон. Доколку имате прашање, не се двоумете да се јавите на 02 / 520 91 76, секој ден од 9 до 17 часот или напишете порака на нашата ФБ страница или мејл: [email protected]
Апликациите ги разгледува тричлена комисија на ЦИВИЛ.“
ЦИВИЛ го спроведува мониторингот на изборите како дел од проектите „Европски перспективи, следно ниво“, финансиран од Министерството за надворешни работи на Сојузна Република Германија, како и „Граѓански објектив“, финансиран од Националната фондација за демократија од САД.
ЦИВИЛ
