Турција најверојатно ќе биде исклучена од стабилизациската сила од 5.000 војници што треба да биде формирана во Појасот Газа, откако Израел јасно стави до знаење дека не сака турски војници да учествуваат во неа.
Американскиот државен секретар Марко Рубио изјави дека услов за формирање на мултинационалната сила е Израел да биде задоволен со националниот состав на нејзините членки. Оваа сила треба да спречи безбедносен вакуум кога ќе започне големата реконструкција на Газа. Турција изрази подготвеност да испрати војници, но Израел соопшти дека се противи на тоа.
Тензиите меѓу Израел и Турција растат поради конфликтот во Сирија, а турскиот претседател Реџеп Таип Ердоган е гледан од израелската влада како премногу блиски сојузник на Муслиманското братство и на самиот Хамас. Исклучувањето на Турција од стабилизациските сили би било контроверзно, со оглед на тоа што Анкара е една од гарантите на „Трамп планот со 20 точки“ за примирје и располага со една од најсилните армии во тој регион, пишува Гардијан.
Се очекува водствтото да го преземе Египет.
Други потенцијални учесници, како Индонезија и Обединетите Арапски Емирати, сепак би сакале оваа сила да добие мандат од Советот за безбедност на Обединетите нации, иако формално не би била под ООН.
Наместо тоа, ќе координира со американскиот Цивилно-воен координативен центар (CMCC), сместен во јужниот израелски град Киријат Гат. Центарот, кој вклучува мал број советници од Велика Британија, Франција, Јордан и Емиратите, во вторникот го инаугурираше американскиот потпретседател Џеј Ди Ванс. CMCC, покрај воената, презема и координациска улога за хуманитарната помош во Газа, иако клучните премини за помош сè уште се затворени.
Главната задача на стабилизациската сила ќе биде разоружување на Хамас и обезбедување услови за функционирање на транзициска палестинска влада, чија форма сè уште се договара. Израелскиот премиер Бенјамин Нетанјаху изјави дека Палестинската управа нема да има улога во поствоена Газа, иако во петокот главните палестински фракции се согласија независен комитет на технократи да го преземе управувањето со територијата.
Во знак на растечките тензии меѓу Анкара и Тел Авив, турскиот тим за итни интервенции, испратен да помогне при пронаоѓање на тела на Палестинци и Израелци во Газа, остана во близина на египетската граница, чекајќи израелска дозвола за влез.
Станува збор за 81 член на турската управа за катастрофи (AFAD), опремени со детектори за живот и обучени кучиња за пребарување.
Претседателот Ердоган изјави во петокот дека САД треба да извршат поголем притисок врз Израел, вклучувајќи санкции и забрани за продажба на оружје, за да го натераат да ги почитува своите обврски од „Трамп планот“.
Рубио, пак, рече дека агенцијата на ООН за палестински бегалци (УНРВА) нема да има улога во Газа, тврдејќи дека станала „подружница на Хамас“.
Оваа изјава го става во судир со многу европски држави, самите Обединети нации и Меѓународниот суд на правдата (ICJ), кој во советодавно мислење оваа недела оцени дека УНРВА е незаменлив механизам за распределба на хуманитарна помош во Газа.
Судот одби да прифати дека Израел доставил „непобитни докази“ дека агенцијата е неповратно инфилтрирана од Хамас.
Заедничката американско-израелска позиција против УНРВА претставува дилема, бидејќи Доналд Трамп во својот план со 20 точки предвиде улога за ООН во дистрибуцијата на помошта во Газа, но сака да ја исклучи токму УНРВА – единствената релевантна агенција за таа задача. ООН сега се соочува со избор: дали да го оспори Трамп и да ја задржи улогата на УНРВА, или да се повлече, пишува Гардијан.
