Генералштабот на вооружените сили на Украина тврди дека добил информација дека воениот комесаријат на белорускиот регион Брест објавил тендер за печатење на 50.000 покани за мобилизација со рок до крајот на оваа година.
Според достапните информации, воениот комесаријат на регионот Брест објави тендер за печатење на 50.000 покани за мобилизација со рок до 31 декември во тековната година, пишува во дневниот извештај на Генералштабот на вооружените сили на Украина.
Белорусија тврди дека не сака директно да се вклучи во војната, но дозволува руските трупи да бидат стационирани на нејзина територија, која Русија ја користеше како позадинска база за нејзината инвазија врз Украина кон крајот на февруари.
Минск и Москва најавија заеднички воени сили во октомври, а украинската војска е загрижена поради „растечката закана“ од нова руска офанзива од Белорусија.
Украина во петокот објави дека гради армирано-бетонски ѕид и други видови барикади на границата со Белорусија. Советникот на украинскиот претседател Кирило Тимошенко изјави дека во областа Волин, на границата со Белорусија, е подигнат ѕид долг три километри, покриен со бодликава жица.
Кијив наведува дека Белорусија и понатаму претставува закана. Поставени се и вреќи со песок, а се копаат ровови, рече Тимошенко. „Тоа не е се, но нема да откриваме детали“, рече официјалниот претставник.
Украинскиот министер за одбрана изјави за Ројтерс дека се уште постои закана од Белорусија, но дека тамошните сили се „во пасивна позиција“. Границата на Украина со Белорусија е долга повеќе од 1.000 километри.
