Војна во Украина – Зеленски: Следните 24 часа ќе бидат клучни за Украина, руските трупи го забавуваат темпото на офанзивата, сепаратистите ја прекинаа мобилизацијата, Украинската и руската делегација седнаа на преговарачка маса
Новинската агенција БелТА на својот Јутјуб канал објави видео како украинската и руската делегација седнале на преговарачка маса, пренесува Укринформ.
Во украинската делегација се Дејвид Арахамиа, шеф на фракцијата „Слуга на народот“, Олексиј Резников, министер за одбрана на Украина, Михаило Подолијак, советник на шефот на кабинетот на претседателот, Андриј Костин, прв заменик-шеф на украинската делегација во трилатералната Контакт група, пратеникот Рустем Умеров и заменик-министерот за надворешни работи, Микола Точицки.
Кабинетот на украинскиот претседател соопшти дека клучното прашање на разговорите ќе биде итен прекин на огнот и повлекување на војниците од Украина.
Од 07:00 часот, 28 февруари 2022 година, градот Мариупол е под контрола на Украина,објави градскиот совет на Мариупол на Фејсбук.
Без струја останаа вкупно 41.229 претплатници, а прекинати се топлинските услуги за 54 станбени куќи. Пумпните станици работат според планираното.
Руската армија го гранатираше градот Изиум во областа Харков.
Москва го забави темпото на офанзива, соопшти денеска, украинската војска за време на петтиот ден од нападот врз Украина.
Летонскиот парламент едногласно изгласа да им дозволи на своите граѓани да се борат во Украина доколку сакаат, се наведува во денешното соопштение на Парламентот.
ИЗЈАВА НА ДЕНОТ
Високиот комесар за надворешна политика и безбедност на ЕУ, Жозеп Борел во интервју за шпанската јавна телевизија ТВЕ денеска изјави дека Европската унија нема да дозволи преговорите меѓу Русија и Украина да завршат со „воспоставување марионетска влада“ во Киев.
– Сите војни завршуваат, но треба да се види на кој начин. Тоа не смее да се случи и нема да дозволиме ова да заврши со задушување на слободите на Украинците и нивната легитимна Влада, која би била заменета со марионетска влада, како што се случуваше во времето кога Русија беше дел од Советскиот Сојуз, рече Борел.
ПРАВДА Поранешните министри за внатрешни работи и транспорти и врски, Гордана Јанкуловска и Миле Јанакиевски, обвинети во случајот „Титаник”, по изјаснувањето за виновни за обвинението, денеска од Кривичниот суд Скопје, беа осудени на вкупно седум години казна затвор. Претседателот на судечкиот совет Осман Шабани информира дека Јанакиевски е осуден на вкупно четири години и шест месеци затвор, додека Јанкуловска, на две години и шест месеци затвор.
МВР ги повика граѓаните на Северна Македонија да ги искористат се уште расположливите комерцијални летови, копнени и морски линии за напуштање на Русија. Ваквото предупредување следува поради можноста да дојде до целосен прекин на авио линиите од и кон Русија.
ПРОТЕСТ Остар протест против воените дејства што ги започна Русија против Украина во отворено писмо упатија над 2.000 руски академици, членови на Руската академија на науката, научници, новинари, интелектуалци. Според потпишаните, одговорноста за покренување нова војна во Европа целосно паѓа на Русија, која нема рационално оправдување за оваа војна.
САНКЦИИ Санкциите на Европската унија против руската Централна банка утринава стапија на сила откако беа објавени во официјалниот Службен весник на ЕУ а Швајцарија исто така соопшти дека „е многу веројатно“ дека наскоро ќе ги замрзне руските средства во своите банки.
ЕУ ЧЛЕНСТВО Украинските власти ја повикуваат Европската унија да ѝ даде веднаш членство на Украина, со специјална процедура. Ваквото барање утринава го истакна украинскиот претседател, Володимир Зеленски, за време на неговото видео обраќање на Телеграм, јави дописник на Укринформ.
ХАКИРАЊЕ „Анонимус уништи повеќе од 300 руски владини, државни медиуми и веб-страници на банки во последните 48 часа, а повеќето од нив моментално се офлајн“, објави хакерската група на Твитер.
ВО ФОКУСОТ НА ЦИВИЛ – Изборниот систем и реформите
ЦИВИЛ организира онлајн настан на тема „Изборен систем и реформи: Препораките на ЦИВИЛ“, среда, 02 март, со почеток во 13 часот. „Во фокусот“ на ЦИВИЛ ќе се најдат повеќе актуелни и исклучително важни аспекти за изборниот систем.
Една изборна единица е најновата играчка во македонската политичка игротека. Истовремено, дел од политичарите во земјата бараат предвремени избори. Изборниот систем, изборната регулатива и самите изборни процеси се спроведуваат, за граѓанките и граѓаните! Не за политичките партии, туку за луѓето да донесат информирана одлука и да изберат кој најмногу им одговара да им служи.
За ова, и за многу други аспекти на прашањата поврзани со изборните процеси, ЦИВИЛ напиша и објави публикации на неколку илјади страници.
ДОМ: Нападот на Украина е и напад врз владеењето на правото, демократијата и мирот во Европа
„Во Украина да продолжат дипломатски напори за постигнување мирен исход. Изразуваме солидарност со украинскиот народ и поддршка за територијалниот интегритет и суверенитет на Украина. За таа цел учествувавме и на мирниот протест во Скопје, под мотото “Застанете со Украина”.
Ова не е само напад на територијалниот интегритет на Украина, туку напад врз владеењето на правото, демократијата и мирот во Европа. Како дел од Европското зелено семејство ја поздравуваме обединетоста на прогресивните демократски сили во спроведувањето санкции, како дел од координираните напори, изјави Маја Морачанин од ДОМ за ЦИВИЛ Медиа.
ДИСТРИКТ – Паскоска: Психолошкото во детската заштита е клучен но запоставен дел во законската легислатигва
Во Дистрикт на Цивил Прес Студио, интервју на Зоран Иванов со Андријана Паскоска – младА научничка, магистер по психолошки науки, психолог во областа социјална заштита, хуманистка, коавторка на трудот „Законот за детска заштита и психологијата“.
АНАЛИЗИ
„Путин заборава дека и другите имаат нуклеарно оружје и дека и тие сакат да си ја бранат својата слобода, начин на животот и границите но не сакаат да ги прекршат принципите на ОН, воспоставени уште по завршетокот на Втората светска војна и колективните договори за безбедност и мир во светот.“, пишува Александар Николиќ Писарев во анализата „Војната во Украина : Нова рамка за студената војна во светот (прв дел)“.
СЛОБОДНА ЗОНА
„На една страна е држава во која луѓето можат во голема мера да кажат што мислат, да добиваат и споделуваат информации, да се здружуваат, да демонстрираат, да се спротивставуваат на одлуките на власта. На другата страна е држава во која постои отворена забрана на сите овие права и слободи.
На една страна е држава во која има релативно независно судство, а на другата има судство кое е апсолутно зависно од волјата на властодржецот.“, пишува Мирјана Најчевска во колумната „Нападот врз Украина го осудија демократските држави – сите“.
„Ирационална е таа емоција, составена од провинциска тесноградост, инает, цинизам, лична разочараност и насобрана горчина. Се работи за една комплексна фрустрација во која кај мнозина од нив се искомбинирани личните неуспеси и животните потфрлања, за кои и не се сосема лично виновни. Фатени се во „челустите“ на противречностите на капитализмот, а Македонците веќе три децении не негуваат голем апетит за него. Ветуваната „подобра иднина“ ги одминува.“, прочитајте во колумната на Сашо Орданоски „Македонците и Украина: Чорба со многу мирудии, а малку мевце!“
„За подобрување на стандардот на пензионерите потребно е во иднина усогласувањата да се вршат не само со индексот на растот на трошоците за живот туку и соодветно на растот на платите. Сметам дека најдобро е зголемувањето по основ на индексот на растот на трошоците за живот да биде линеарно односно исто за сите пензионери, а по основ на растот на платите да биде процентуално и да го добиваат само пензионерите кои имаат пензија помала од просечната плата во државата“, Велин Стојановски во колумната „Зголемените пензии предизвикаа тензии“.
Д. Тахири
