Откако минатогодишното издание на големиот Get EXITed настан во Струмица ги надмина сите очекувања, собирајќи повеќе од 20.000 посетители, тимот на EXIT во соработка со општина Струмица организира второ издание, со уште поамбициозни планови! Новиот Get EXITed настан ќе се одржи на 7 септември во струмичкиот Голем парк, каде за прв пат ќе настапи најбараното музичко име на нашите простори – Констракта. Наскоро ќе бидат познати и други меѓународни и регионални музички ѕвезди кои и оваа година во уште поголем број ќе донесат во Струмица гости од целиот регион.
Конференцијата на која беше потврдено второто издание на големиот Get EXITed настан во Струмица се одржа во петокот во Градското собрание на Нови Сад на која присуствуваа музичарката Ана Ѓуриќ Констракта, градоначалникот на Нови Сад Милан Ѓуриќ, градоначалникот на општина Струмица Костадин Костадинов и директорот и основач на егзит фестивалската групација, Душан Ковачевиќ.
Ковачевиќ, истакна дека EXIT минатата година организирал дури 26 настани во 10 земји и дека EXIT е, по ИТ секторот, најголемиот извозник на домашната креативна индустрија.
„Од првиот EXIT, гостите од Северна Македонија се меѓу најбројните, а особено ни е задоволство што EXIT, по целиот регион, конечно пристигна и во Северна Македонија со својот фестивал. Минатогодишното издание навистина ги надмина сите очекувања, за време на манифестацијата немаше слободни места за сместување во Струмица и околината, а доаѓаа туристи од целиот регион“, рече Ковачевиќ.
Градоначалникот на Нови Сад, Милан Ѓуриќ, рече дека Нови Сад е препознаен во регионот и пошироко како извозник на креативни индустрии и жариште на фестивалско-музички туризам.
„Горд сум на фактот што EXIT произлезе од нашиот град пред повеќе од две децении и споделуваме заедничка желба да го видиме да продолжи да се развива. На организаторите на фестивалот им посакувам уште многу успеси и квалитетни проекти, а на Констракта, како и на другите изведувачи, на 7 септември да ги надмине очекувањата и да оствари уште повеќе од минатогодишните 20.000 посети“, рече Ѓуриќ.
Првиот човек на општина Струмица Костадин Костадинов истакна дека тој и струмичани со задоволство се домаќини на големиот настан на кој ќе настапат музички ѕвезди.
„Како прв човек на општина Струмица, оттука, од Нови Сад, сакам да истакнам дека и оваа година ќе се потрудиме настанот GetEXITed повторно да биде грандиозен. Инспирирани од културната размена и реализација на првото GetEXITed издание, се договоривме да го започнеме процесот на збратимување меѓу Нови Сад и Струмица“, рече Костадинов.
Музичарката Ана Ѓуриќ Констракта, која штотуку ја претстави новата песна „Еве, ветувам“, изјави дека со нетрпение очекува со помош на „Егзит“ и таа да придонесе за културното поврзување.
„Се радуваме на македонската публика, која е строга, не може кај неа се да помине, треба да се потрудиме да ја придобиеме“, вели Констракта.
Наскоро ќе бидат објавени и другите светски и регионални ѕвезди кои ќе настапат во струмичкиот Голем парк на 7 септември, а влезот на големиот Get EXITed настан ќе биде бесплатен.
Извор: Б92
