Косовската полиција вчера го приведе помошникот-директор на Канцеларијата за Косово во Владата на Србија, Игор Поповиќ, по говорот што го одржа во текот на денот во Раховец, град во југозападно Косово, јавуваат косовски медиуми.
Според 24-часовниот полициски извештај, по сослушувањето тој бил приведен, додека два мобилни телефони биле привремено запленети како материјален доказ.
Вршителот на должноста министер за внатрешни работи на Косово, Џелал Свечла, во објава на Фејсбук во петокот изјави дека Поповиќ ја опишал Ослободителната војска на Косово (ОВК) како терористичка организација, споредувајќи ги нејзините постапки со сериозни настани во светската историја.
„Поради оваа причина, српскиот владин службеник бил приведен на граничниот премин Брњак, а потоа однесен во полициската станица во Северна Митровица. Се очекува против него да бидат преземени мерки според законите што важат во нашата земја.“, изјави Свечла.
Меѓу другото, Свечла рече дека Косово, како демократска и суверена држава, нема да толерира навреди и сквернавење на историјата, а камоли на војната предводена од ОВК.
„Овој дел од историјата ужива почит од целиот прогресивен свет.“
Ослободителната војска на Косово (ОВК) беше политичко-воена сила која се бореше за ослободување на Косово од српската власт во периодот 1990-1999 година.
Категориите што произлегоа од војната, Организацијата на ветерани на ОВК (ОВЛ-ОВК), Здружението на воени инвалиди и Здружението на семејства на маченици, остро реагираа на, како што рекоа, присуството на помошникот на Петковиќ во Косово.
„Ова е менталитетот на подредените на [поранешниот српски лидер Слободан] Милошевиќ, кои денес ги претставува српскиот претседател Александар Вучиќ, поранешен министер на тој геноциден режим“, соопштија организациите во објава на Фејсбук.
Тие исто така рекоа дека „секој обид за провоцирање, оцрнување на ОВК и користење на територијата на Косово за антинационална пропаганда е неприфатлив и мора решително да се спречи“.
За време на војната во Косово во 1998/99 година, над 13.000 цивили беа убиени, додека илјадници други исчезнаа.
Околу 1.600 луѓе, претежно Албанци, сè уште не се пронајдени.
Со текот на годините, косовските правосудни органи обвинија или осудија неколку лица за воени злосторства.
Д. Т.
