Актерот Благој Веселинов во разговор за ЦИВИЛ Медиа зборува за изминатата 2017 година, неговите успеси на професионален план, но и за состојбата со културата во Македонија, со оглед на сите политички случувања. За Перспективи 2018, Веселинов ги открива своите надежи и препораки, како до уметниците, така и до граѓаните, но и до политичарите.
„2017 година за мене пројде многу убаво на професионално поле. Остваривме повеќе од 10 интернационални гостувања и на сите тие места кои ги посетивме бевме прекрасно пречекани и се вративме со прекрасни спомени. Но, сепак, додека траеја сите тие гостувања, во нашата држава константно се случуваа некои проблеми, некои политички ситуации, протести и апсења, така што во ниту еден момент културата не дојде до израз. Ние во изминатиот период се боревме со нешто што се нарекува ‘јадење на политика’.
Во 2018 година искрено посакувам некако политиката да стане секундарна во медиумскиот простор. Знам дека тоа никогаш нема да се случи, но, ете, моја желба е да посакам барем 10% од тој политички простор да биде ослободен за култура. Исто така посакувам оваа година да почнеме да ги нагласуваме нашите разлики, затоа што мислам дека 27 години се обидуваме да ги прикажеме нашите сличности и не дојдовме до некој посебен резултат на тој начин. Мислам дека оваа година е година во која ќе мораме да ги нагласиме нашите разлики, да ги прифатиме истите и да почнеме да живееме во општество кое веројатно треба да почнеме да го градиме сите заедно без разлика на религија и политичка определба.
На политичарите би им посакал во новата година да бидат многу претпазливи со тоа што ќе го направат во 2018 година која јас ја гледам како многу значајна година за себе и за мојата земја.
На граѓаните кои живеат во оваа држава би им посакал спокој. Би посакал конечно да се одмориме, да почнеме да се почитуваме, да почнеме од самите себе и да се промениме во однос на тоа што значи да се биде еден модерен граѓанин – граѓанин на 21 век“, вели Веселинов.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество.
„Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Маја Ивановска
Камера и фотографија: Дехран Муратов
Монтажа: Биљана Јордановска